Uzanyelwa kwiChippa olizwa ngendaba ijezi kwiPirates
- Intatheli yeLISENETHINI
Umdlali wasesiswini we-Orlando Pirates, uSiphelo Baloni, uzobolekiswa kwiChippa United kule sizini.
I-SABC Sport ibika ukuthi isivumelwano kumele siqedwe ekupheleni kwalelo sonto.
Lo mdlali oneminyaka engu-24 ufuna iqembu azodlala njalo kulo ukuze akhule kwiBetway Premiership.
IChippa ibonakala iyiqembu elikahle ukuthi anikezwe kulo ithuba lokudlala njalo.
UBaloni usayine nePirates esuka kwi-All Stars edlala kwiNational First Division ngoJuni nyakenye.
Nokho akazange adlale ngendlela obekulindeleke ngayo ngesizini yakhe yokuqala kuBucs.
Umqeqeshi wePirates uJose Riveiro usebenzise iBaloni emidlalweni engu-13 nje kuphela isizini yonke.
Manje kukhulunywa ngokubolekiswa kwiChippa United lapho kulindeleke ukuthi adlondlobale ngaphansi komqeqeshi uKwanele Kopo.
Ngesizini edlule iChippa United ibibolekwe umdlali wasesiswini wePirates uGoodman Mosele.
UMosele usebuyele kwiPirates kodwa akakabonakali eqenjini kule sizini ngenxa yokulimala.
IPirates isidlale imidlalo emihlanu kule sizini, okuhlanganisa nemidlalo emithathu yeMTN8, la isifinyelele khona kowamanqamu.
Iphinde yadlala nasemizuliswaneni yokuqala kwiCaf Champions League.
UBaloni ufakwe kanye kuphela eqenjini, ngesikhathi benqoba kwiSuperSport United kuma-quarterfinal eMTN8.
IChippa United ibimatasatasa emakethe yabadlali njengoba ilungiselela isizini entsha ezoqala ngempelasonto.
Kulindeleke ukuthi uBaloni abe yingxenye ebalulekile yeqembu.
Okuthatha amehlo wukuthi umdlalo wokuqala weChippa izowudlala nePirates e-Orlando Stadium ngoSepthemba 18.
