I-SAPS ishaya phansi ngonyawo, ayifune tsotsi kwidabhi kulokhu
Ukukhathazeka ngezokuphepha kwidabhi yaseSoweto kuthathelwe phezulu kulokhu futhi okuwotsotsana okuzothatha amashansi kuzohlangana nembibizane.
Uphiko lwamaphoyisa aseNingizimu Afrika, iSAPS luxwayise abalandeli abazozozama ukwenza ubugebengu nokma umngunyathi kulo mdlalo ukuthi bafike belungele ukuyolala ezikhindini.
Emdlalweni odlule, ukuminyana e-FNB Stadium kwasusa ukukhathazeka okukhulu ngemuva kokuthi kwaba nabalandeli abaningi kunamathikithi ayedayisiwe.
UMajor General weSAPS uFred Kekana uthi amaphoyisa azobe emehlomane, eqaphe ngeso lokhozi izenzo ezingekho emthethweni kwidabhi.
Lo mdlalo weBetway Premiership phakathi kwe-Orlando Pirates neKaizer Chiefs uzoba ngeSonto kule nkundla yodumo eGoli.
Amathikithi omdlalo adayiswa aphela kungakapheli ngisho amahora angu-24 ekhishiwe ngenyanga edlule, okugcizelela udumo lwalo mdlalo.
Ekhuluma nabezindaba eGoli ngaphambi komdlalo, uKekana ukhiphe isexwayiso esiqinile sokuthi ngebe bubekezelelwe ubugebengu kwidabhi.
“Sifuna ukucela kubantu bakithi ukuthi ukusetshenziswa kabi kwezidakamizwa ngeke kuvunyelwe.
“Ukuthengisa amathikithi omgunyathi ngeke kuvunyelwe; kuyicala futhi uzoboshwa,” kusho lo sigaxamabhande.
Uphinde wagcizelela ukubaluleka kokuziphatha kahle nokuhlonipha umoya womdlalo.
“Ukulwa ngeke kuvunyelwe ngoba ezemidlalo zenzelwe ukuzijabulisa. Iqembu elilodwa linqoba kanti elinye liyahlulwa — ibhola linjalo nje.
“Uma ungenalo ithikithi, ungasondeli kwakusondela enkundleni. Uzoboshelwa amathikithi omgunyathi.
“Izibhamu noma izikhali azizovunyelwa emagcekeni enkundla.”
Njengoba amasango evulwa ngo-10 ekuseni, abalandeli banxuswe ukuthi bafike kusenesikhathi.
Banxenwe nokuthi bahambisane nayo yonke imithetho ukuze kuqinisekiswe ukuzijabulisa okuphephile kwidabhi.
