IPirates neChiefs noshintsho olunqala kwidabhi

Usuku obelulindwe ngabomvu ebholeni lakuleli seluze lwafika kanti i-Orlando Pirates yenze uguquko olunqala eqenjini elizoqala umdlalo.

I-Orlando Pirates ivakashele iKaizer Chiefs eFNB Stadium la lezi zinkunzi zakuleli zizobanga amaphuzu amathathu emdlalweni weBetway Premiership. 

Womabili lamaqembu awafunisa okwemali amaphuzu aphelele kulo mdlalo okulindeleke udlalwe phambi kwenkundla egcwele phama.

Amathikithi alo mdlalo adayisa aphela kusasele amasonto amabili kufike usuku lwawo, okuyinkomba yobukhulu bawo kubalandeli.

Iqembu lasekhaya, iKaizer Chiefs, njengamanje lingaphandle kwayisishiyagalombili aphezulu kwilogi.

Lifuna lamaphuzu ukuze libuyele, lizame ukuqinisa indawo yalo ukugwema ihlazo elenzeke ngesizini edlule.

Amakhosi aqeda ngaphandle kwalamaqembu aphezulu ngesizini edlule, nokwaphoqa ukuthi kwenziwe izinguquko ezinqala eqenjini.

Kwaxoshwa inqwaba yabadlali nabaqeqeshi njengoba manje selicijwa uNasreddine Nabi ofike enomlando omuhle ekuqaleni kwesizini.

Nokho indlu ivuza ekhona nakulokhu njengoba ebukeka ehluleka ukululungisa uphahla olufaka amanzi endlini. 

IPirates yona ifuna ukugwema ukuthi iMamelodi Sundowns ilinwebe kakhulu igebe eyishiya ngalo phezulu kwilogi.

Phela iyona kuphela esembangweni wesicoco seligi naMasandawana yize ibukeka seyihubha utalagu nje. 

Zombili lezi zinkunzi ziwalahlile amaphuzu emidlalweni edlule – iKaizer Chiefs ishaywe yiMarumo Gallants, i-Orlando Pirates yashaywa yiSekhukhune United. 

Umqeqeshi wePirates, uJose Riveiro ubuyise uMakhehleni Makhaula obephunyuziwe phakathi nesonto.

• FUNDA NALA | I-Arrows isikhombe abadlali ababili abanamava indlela

Ungene endaweni kaKabelo Dlamini. UTapelo Xoki yena ungene endaweni kaNkosinathi Sibisi othole ikhadi elibomvu. 

• SIBAMBE NAKU-FACEBOOK | Lisenethini.co.za 

IChiefs yona ivale esikaWandile Duba ngoGlody Lilepo. UDuba naye umisiwe ngenxa yamakhadi amane aphuzi. 

• Ibophele kanje iChiefs (4-1-4-1 ): Bvuma – Solomons, Cross, Kwinika, Dove – Maart – Sirino, Moodi, Shabalala, Ngcobo – Lilepo

• Ebhentshini: Petersen, Mashiane, Miguel, Castillo, Matlou, Cele, Mthethwa, Du Preez, Morris

• IPirates yona ibophele kanje: (4-3-3): Chaine – Shandu, Mako, Xoki, Mbokazi – Makhaula, Mofokeng, Mbatha – Nkota, Makgopa, Hotto

• Ebhentshini: Buthelezi, Selepe, Radiopane, Ndlozi, Madiba, Kimvuidi, Maela, Mabasa, Dlamini