IPirates ‘igqilaza’ iChiefs ngezinuquko ezimemezelayo

I-Orlando Pirates iqhulule intululwane yolwazi ngamalungiselelo ayo esizini ezayo kuleli sonto, futhi manje amehlo asebheke kwiKaizer Chiefs ukuthi yenze okufanayo. 

Izimemezelo zakamuva zeBucs zijabulise abalandeli bawo, zabe sezifaka izimbangi zawo Amakhosi ngaphansi kwengcindezi.

IPirates iqoke futhi yamemezela u-Abdeslam Ouaddou njengomqeqeshi wayo omusha. 

Iphinde yasayina yabe seyimemezela uSipho Mbule odedelwe yiMamelodi Sundowns njengomdlali wayo. 

Phezu kwalokho, le kilabhu iveze uhlelo lwayo oluwuchungechunge lukamabonakude la kuzocaciswa khona okwenzeke ngoMonnapule Saleng.

IPirates iphinde yakhipha izithombe ezikhombisa ngamakhithi ayo asekhaya nawasekuhambeni esizini ezayo. 

Ukwethulwa kwekhithi, okuhlelelwe uJulayi 24 kuJulayi, kuza nomyalezo othi: “It’s in our bones (Kusemathanjeni ethu.”

Lezi zibuyekezo zisuse isasasa kubalandeli be-Orlando Pirates, kanti abeKaizer Chiefs bona sebeqala ukungahlaliseki.

IChiefs ayikamemezeli mdlali emsayinile. Nokho isibaqinisekisile abadlali abahlanu asebekhululiwe.

Iningi labalandeli bayo sebeqalile ukungabaza izinhlelo zeqembu nokuthi kungani zigcinwa ziyimfihlo. 

Omunye ubhale ezinkundleni zokuxhumana wathi: “IPirates yenziwa okweqembu elikhulu. Thina ngapha sisalinde ukuthi kwenzeke okuthile.”

Kukholakala ukuthi iChiefs isayinise u-Ethan Chislett kanti isaxoxisana nabanye okukhona kubo noRowan Human. 

Kodwa alikho izwi elisemthethweni elivele eqenjini. Ukuthula kwayo kwenza abalandeli bayo bakhungatheke kakhulu.

• FUNDA NALA | UTso Vilakazi uyamngabaza u-Ouaddou kodwa ufuna asekwe

I-Orlando Pirates ikhombisa inhloso ecacile kanti iKaizer Chiefs kuzomele imemezele ezayo izinguquko maduze. 

Abalandeli bafuna izimpendulo, noma izibuyekezo ngezinguquko eqenjini. Futhi bafuna ukwazi okwenzekayo. 

• SIJOYINE KU-FACEBOOK | Lisenethini.co.za  

Nokho, iKaizer Chiefs ne-Orlando Pirates bamemezele izinhlelo zabo ezisemthethweni zokulungiselela isizini eNetherlands naseSpain ngokulandelana.