ISundowns isisheshe yaqeda nobengumdlali wePirates
IMamelodi Sundowns isimemezele ngokusemthethweni ukusayinisa obengumdlali wasemuva we-Orlando Pirates, uDeano Van Rooyen.
AMasandawana aqinisa iqembu lawo njengoba ebhekene nemidlalo eminingi kule sizini.
Lo mdlali ujoyina iSundowns ngenkontileka yeminyaka eminingi kodwa engadalulwanga.
Ukufika kukaVan Rooyen kuza ngesikhathi iSundowns idinga ukujula endaweni yasemuva, ikakhulukazi kwesokudla.
UKhuliso Mudau ubhekene nesikhathi eside engadlali ngenxa yokulimala kanzima, kanti uZuko Mdunyelwa naye ubhekene nenkinga yokuqina komzimba.
Lokhu kushiye leli qembu noThapelo Morena kuphela kubadlali abanamava kule ndawo emuva kanti naye usenakho ukuthandwa ukulimala.
UVan Rooyen ubengumdlali wePirates kusukela ngo-2024, ngesikhathi ejoyina amaBhakabhaka esuka kwiStellenbosch FC.
Uhambe kuleli qembu ngo-Agasti ngemuva kokuthi izinhlangothi zombili zivumelene ngokunqamula inkontileka yakhe.
Ngaphambi kokuya eSoweto, uVan Rooyen wazakhela igama kwiStellenbosch, lapho aba ngumdlali obalulekile khona futhi wagcina eneerekhodi lokudlala imidlalo eminingi kuleli qembu.
Waphinde waba yingxenye yeqembu elanqoba iCarling Knockout Cup ngo-2023.
Manje uzothola ithuba lokuqala isahluko esisha eChloorkop ngaphansi komqeqeshi uMiguel Cardoso.
Ukusayinwa kwakhe kunikeza iMamelodi Sundowns enye indlela enolwazi, ikakhulukazi njengoba iqembu liqhudelana emiqhudelwaneni yasekhaya, neyamazwe ngamazwe.
- EZISHISAYO| Cofa lapha usithole kuWhatsApp
