IChiefs incoma uDu Preez osebuyele ‘akhaya’
IStellenbosch FC isimemezele ngokusemthethweni ukubuya komgadli u-Ashley Du Preez, osayine inkontileka yesikhathi eside ngemuva kokushiya i-Kaizer Chiefs.
UDu Preez, odabuka e-Idas Valley, waqala ukudlala ibhola elikhokhelayo kwiStellenbosch ngo-2016.
Wadlala imidlalo engu-98 kuyo yonke imiqhudelwano eminyakeni eyisithupha ngaphambi kokujoyina iChiefs ekuqaleni kwesizini ka-2022/23.
Lo mdlali oneminyaka engu-29 ubudala uhlale amasizini amane eNaturena, lapho asize khona Amakhosi ukunqoba iNedbank Cup ngo-2025.
Ekhuluma ngokubuya kwakhe, uDu Preez uthe wayevele enakho ukuthi uyobuyela ekhaya ngelinye ilanga.
“Bengihlale ngazi ukuthi ngizobuya kwiStellenbosch. Kuhle kakhulu ukubuyela lapho engakhulela khona nasekilabhini lapho kwaqala khona umsebenzi wami.
“Kuyintokozo enkulu ukuphinde ngimele le kilabhu nomphakathi wakithi,” kusho yena.
Isikhulu esiphezulu seStellenbosch, uRob Benadie, sithe sijabule kakhulu ngokubuyisa uDu Preez.
“U-Ashley uhlale enobudlelwano obukhethekile neStellenbosch.
“Ungumdlali osefakazele ikhono lakhe kwiBetway Premiership futhi sizozuza kakhulu ngokuba khona kwakhe,” kusho uBenadie.
IStellenbosch inike uDu Preez ijezi elinguNombolo 10, kanti kulindeleke ukuthi aqale ukubonakala emdlalweni weBetway Premiership nePolokwane City ngo-Agasti 11.
- FUNDA NALA | IDowns iqoke ogajwe wuSuthu esikhundleni esiphezulu
I-Kaizer Chiefs nayo iqinisekisile ukudayiswa kwakhe, yabonga u-Ashley Du Preez ngokuzinikela kwakhe ngesikhathi eseNaturena.
“Sibonga u-Ashley ngomsebenzi wakhe, ukuzinikela nobungcweti ngesikhathi esedlalela iKaizer Chiefs.
“Simfisela okuhle kodwa esigabeni esisha somsebenzi wakhe,” kusho isitatimende seChiefs.
- EZISHISAYO| Cofa lapha usithole kuWhatsApp
