Ezintsha nge-VAR kwiPSL – imali yayo isikhona

Ukwethulwa osekunesikhathi kulindelwe kobuchwepheshe be-Video Assistant Referee (VAR) ebholeni laseNingizimu Afrika sekusondele kakhulu. 

Umnyango wezemidlalo uzinikele ngokusemthethweni ngokukhipha u-R90 million wokwenza lo msebenzi.

Lokhu kuhambisana nesithembiso sikangqongqoshe uGayton McKenzie sokuletha iVAR kwiPremier Soccer League (PSL).

Empendulweni ebhalwe phansi yemibuzo yeLungu lePhalamende uMakashule Gana waseRise Mzansi, uMnyango ukuqinisekisile ukuthi imali yokuqala lolu hlelo seyibekwe eceleni kwisabelomali sawo. 

Lesi sibuyekezo siphawula umnyakazo obambekayo kakhulu okwamanje ekutheni izoqala ngampela i-VAR ebholeni lakuleli.

Umnyango uveze lokhu:

1. Kuzosungulwa ikomidi elizohlunga iziphakamiso ukuze lihlole amabhidi athunyelwe kwiSouth African Football Association (Safa),
2. ISafa isithole iziphakamiso ezibalelwa ku-12 ezinkampanini ezinentshisekelo yokuhlinzeka ngobuchwepheshe balolu hlelo
3. Inqubo yokuhlunga kulindeleke ukuthi iqale ekuqaleni kukaJuni.

Yize kungakaqali ukuthengwa kwempahla kodwa uMnyango uthe maduze uzosebenzisana neSafa ukuze kuphothulwe yonke imigomo bese kusayinwa isivumelwano esisemthethweni.

Uhlelo lokulungisa nokugcinwa kohlelo lwe-VAR lusazodingidwa ukuthi luzohamba kanjani. 

Lokhu kuzovezwa kwimemorandamu yesivumelwano phakathi kweSafa nomnyango. 

Umnyango uphinde waqinisekisa ukuthi ubuchwepheshe bemigomo kungenzeka bube yingxenye yohlelo lulonke.

• FUNDA NALA | Uvelile owephutha lokudlaliswa koweBafana enekhadi

Lezi zimpendulo ziqhamuke ngesikhathi iSafa yethula umbiko wayo wonyaka ka-2023-24 ekomitini lePhalamende lezemidlalo.

• SITHOLE NAKU-FACEBOOK | Lisenethini.co.za

UNgqongqoshe uMcKenzie uzibophezele ekutheni i-VAR isebenze ngesizini ye-PSL ka-2025/26, ezoqala ngo-Agasti.