Kuphelile ukuntunta nendishi, uDolly usethole ikhaya

Owake waba ngumdlali weKaizer Chiefs neMamelodi Sundowns, uKeagan Dolly, usethole elinye iqembu azodlala kulo kule sizini.

UDolly, oneminyaka engu-33 udubala, ubengenalo iqembu kusukela ehlukane neCape Town City ekupheleni kwesizini edlule.

ICity ihlakaze iqembu layo ngemuva kokuthi ihlulekile ukubuyela kwiBetway Premiership kulandela ukuhlulwa kweyokuhlunga.

Lo mdlali wasesiswini wayejoyine iCape Town City ngemuva kokudlala kwiTS Galaxy.

IRockets yamthatha ngemuva kokushiya iKaizer Chiefs ngoJulayi 2024.

Nokho ube ngomunye walabo badlali abakhululiwe kwiCity, kanti manje usejoyine iHope FC.

U-Keagan Dolly useyingxenye yakamuva yaleli qembu elisha elisanda kukhuphukela kwiMotsepe Foundation Championship.

Umdlali wethulwe yiHope FC ngokusemthethweni ngoMsombuluko ntambama.

“UKeagan Dolly usejoyine ezibomvu,” kusho iqembu. “Ungumdlali ongadingi ukwethulwa.”

“U-Keagan Dolly uletha isipiliyoni seminyaka eminingi ezingeni eliphezulu, kuleli nakwamanye amazwe, nezinga lekhono esaziyo ukuthi unalo.

“Sijabule ukwamukela uKeagan nomndeni wakhe okusha kuma-Immortals.

“Sifuna ukumnika ithuba lokujabulela ibhola, aziveze futhi abe yilo mdlali esaziyo ukuthi angaba nguye.

“Siyakwamukela kuma-Immortals, Keagan.”