Inhliziyo isale emuva uMessi eshiya kwi-Argentina

ULionel Messi usememezele ukuthi usethatha umhlalaphansi ebholeni lamazwe ngamazwe ngemuva kokuhola i-Argentina yaya kowamanqamu kwiNdebe yoMhlaba kabili kulandelana. 

I-Argentina yagcina ihlulwe yiSpain ngo 1-0 e-East Rutherford, eNew Jersey, eMetLife Stadium e-United States. 

UMessi uthe: “Kube yisinqumo esingibuhlungu, futhi sisabuhlungu enhliziyweni yami, kodwa ngiyabona ukuthi yisikhathi esifanele.”

Ubuye wachaza ukuthi ubenikela ngakho konke: “Ngiyafunga ukuthi bengenza konke okusemndleni.

“Hhayi eminyakeni yakamuva nje kuphela lapho siwine khona konke, kodwa nangaphambilini, ngilwela leli jezi.” 

Ngemva kokushona kukayise, uJorge, ngo-Agasti, wayesevele eshilo ukuthi kungenzeka aphume ezingeni lamazwe ngamazwe.

Njengoba eshiya kwi-Argentina, u-Lionel Messi uzoqhubeka ekilabhini yakhe i-Inter Miami kwi-US Major League Soccer kuze kuphele isizini ka-2028.

Kulo mqhudelwano wakamuva, uMessi ushaye amagoli ayisishiyagalombili, wakhela ozakwabo amabili. 

Wagqama kakhulu ngesikhathi bebuya sekuvalwe amehlo bedlala ne-England kowandulela owamanqamu. 

Kodwa iphupho lokuphakamisa indebe laqedwa yiSpain, kwase kuba nezigameko ezingemnandi emva komdlalo. 

ULeandro Paredes nabanye abadlali base-Argentina bathola ukuvinjelwa nezinhlawulo ngenxa yokungqubuzana nabadlali baseSpain. 

U-Lionel Messi wabonakala ekhala lapho emukela indondo yesiliva, ethi ubuhlungu “bukhulu kakhulu” futhi “lesi silonda sizothatha isikhathu ukuphola.”

UMengameli weFIFA, uGianni Infantino, umchaze “njengomunye wabadlali abakhulu kunabo bonke emlandweni womdlalo” futhi wambonga ngenjabulo ayinike izigidi zabalandeli. 

UMessi wabizwa okokuqala eqenjini lesizwe ngo-2005 nguJose Nestor Pekerman eneminyaka engu-18 ubudala.

• FUNDA NALA | UDolly usevuke ngeqembu elisha

Ugcine edlale imidlalo engu-207 washaya amagoli angu-125, waphinde wawina iCopa America ngo-2021 nango-2024 emsebenzini wamazwe weminyaka engu-21.

• EZISHISAYO| Cofa lapha usithole kuWhatsApp