ElePSL enkingeni neFifa livinjelwa ukubhalisa abadlali

Elinye lamaqembu adlala kwiBetway Premiership seliphinde langena enkingeni ne-Fifa njengoba selivinjelwe ukubhalisa abadlali abasha.

Lokhu kulandela ukuhluleka ukukhokhela obengumdlali walo wasesiswini, uRoland Sanou.

USanou, oneminyaka engu-24 ubudala, wayenenkontileka neChippa United ngesizini ka-2024/25.

Kodwa akazange adlale nowodwa umdlalo osemthethweni ngemuva kokujoyina mahhala esuka kwiMoroka Swallows.

Lo mdlali waseBurkina Faso wadlulisela lolu daba kwiFifa, esigcine ithathe isinqumo esivuna yena.

Encwadini ebhalelwe leli qembu, i-Fifa yazise iChippa United ukuthi isivinjelwe ukubhalisa abadlali abasha, ezingeni lamazwe omhlaba naseNingizimu Afrika.

Lesi sigwebo sizohlala sisebenza kuze kube yilapho ikilabhu isikhokhe yonke imali eyikweleta lo mdlali.

Lesi sigwebo ngesamawindi amathathu alandelanayo okudayiselana ngabadlali.

I-Fifa iphinde yayalela iSouth African Football Association (Safa) ukuthi isebenzise ngokushesha lesi sivimbelo sokubhalisa abadlali.

USanou wadlala imidlalo engu-12 kwiSwallows ngemuva kokujoyina esuka kwiRoyal FC Bobo yaseBurkina Faso. 

• FUNDA NALA | UNcanana ucacisa ‘ngokweyisa’ iPirates

Ngemuva kokushiya iChippa United, ubuyele ezweni lakubo lapho manje edlalela khona iVitesse FC.

• EZISHISAYO| Cofa lapha usithole kuWhatsApp