ElePremiership lishela uMthombeni owagila iPirates
Sekuneqembu leBetway Premiership elisha amashushu ngonozinti weCasric Stars uWandile Mthombeni owazakhela igama ngokugila i-Orlando Pirates kwiNedbank Cup ngesizini edlule.
Lo nozinti oneminyaka engu-26 wadonsa amehlo ngesikhathi esiza iCasric Stars ikhipha iPirates esigabeni seLast 16 kulo mqhudelwano.
UMthombeni wavimba amabhola amaningi kulo mdlalo, waphinde wavimba namaphenathi ukuze banqobe ngo 5-4.
Waphinde wadlala kahle ngesikhathi iCasric ishaya AmaZulu ngo 2-1 ngemuva kwesikhathi esengeziwe ukuze ifinyelele kowandulela owamanqamu.
Yize uhambo lweCasric lwaphela ngokuhlulwa ngo 1-0 yiDurban City, ukusebenza kuka-Wandile Mthombeni kudonse amehlo amaqembu amaningi eBetway Premiership.
Kubikwa ukuthi lo nozinti kumanje uhlolwa yiSiwelele FC, kanti usehlabe abaqeqeshi umxhwele ngezinga lakhe.
Nokho, usenenkontileka neCasric Stars, okusho ukuthi womabili amaqembu kusazodingeka avumelane ngemali yokudayiselana ngaphambi kokuthi kuqedwe isivumelwano.
ISiwelele ifuna ukuqinisa indawo yonozinti ngemuva kokuhamba kukaRicardo Goss obuyele kwiMamelodi Sundowns ebimboleke kuyo.
Leli qembu lisanda kusayina unozinti weBotswana uGoitseone Phoko, kanti uSamukelo Xulu kubikwa ukuthi angase ahambe naye, okushiya isikhala somunye unozinti.
ISiwelele ibe ngelinye lamaqembu amatasa kakhulu emakethe yabadlali kuleli windi lokudayiselana.
Isayine abadlali abaningi abasha futhi yadedela abangaphezu kuka-20 ngemuva kokuqeda endaweni ka-10 kwiBetway Premiership ngesizini edlule.
- FUNDA NALA | Sebethole ikhaya elisha abagajwe yiPirates
Njengoba iCasric Stars iphethwe nguyise ka-Wandile, uBucs Mthombeni, kubukeka kuzoba lula ukuqedela isivumelawano.
Nokho u-Wandile Mthombeni yena wathi ufisa ukudlala kuyo i-Orlando Pirates le ayigila futhi wazakhela igama ngayo.
- EZISHISAYO|Â Cofa lapha usithole kuWhatsApp
