Dololo abeChiefs uHugo Broos eqoka eleBafana Bafana
UHugo Broos useqede ukuqagela ethula isikwati sakhe sokuqala azoqoka kuso iBafana Bafana azodlala ngayo ekupheleni kwale nyanga.
IBafana izozwana amandla nePanama. Iqembu eliqokwe uBroos liyingxube yabadlali abanamava nezingqwele.
Lesi sikwati sinabadlali abaningi abasuka kwi-Orlando Pirates neMamelodi Sundowns kanti dololo kwiKaizer Chiefs.
Ukufakwa kwezihlabani ezimbalwa ezizinze phesheya kwezilwandle kukhombisa inhloso kaBroos ngaphambi kweNdebe yoMhlaba ngoJuni.
OKUHLABAHLOSILE
- Ukubuya kukaMshishi: Umakadebona uThemba Zwane ufakiwe kuleli qembu.
Naphezu kwemibuzo yakamuva mayelana neminyaka yakhe nokungadlali njalo kwiMamelodi Sundowns izinga lakhe lisalokhu lingenakuphikwa. - UTito ungenile: Intandokazi yabalandeli kwiPirates uPatrick ‘Tito’ Maswanganyi uyigcinile indawo yakhe.
Ukwenza kahle kwakamuva kulezi zinkunzi zaseSoweto kumbuyisele kuleli qembu. - Ukuphumelela kukaMakhanya: Izindaba ezinkulu kwabaningi wukubizelwa okokuqala kuka-Olwethu Makhanya.
Njengamanje wenza umsebenzi omuhle kwiMajor League Soccer e-US la edlala khona kwiPhiladelphia Union. - UMthetheleli Mthiyane: Lo mdlali wasesiswini weStellenbosch FC, oneminyaka engu-25, naye ufakiwe.
- Kugajwe uMbule: USipho Mbule akafakwanga kuleli qembu kulandela ukungabonakali kwakhe kwiPirates muva nje.
- Abekho abadlali beChiefs: Akukho noyedwa umdlali weKaizer Chiefs kuleli qembu kulandela ukungenzi kahle kwaleli qembu muva nje.
- Ukuzitshwa kowe-Arrows: USiyanda Ndlovu ngomunye wabadlali obekubhekwe ukuthi engangena kuleli qembu kodwa akekho
KUBUYE ABAPHESHEYA
UHugo Broos ubabuyisile abadlala phesheya ukuze engeze ukuqina eqenjini lakhe leBafana Bafana.
Ngaphandle kukaMbekezeli Mbokazi, uMakhanya noBongolethu Hlongwane abazinze e-US, kukhona uLyle Foster, uLuke Le Roux noTylon Smith abase-England, u-Ime Okon oseGermany noSphephephelo Sithole osePortugal.
Leli qembu liveza isandla esisha sikaBroos nokuthi yize esenawo umgogodla wakhe, usababheka nabanye abadlali abenza kahle.
FUNDA NALA | UKadodia uphawula ngolomqeqeshi omusha
Ukufakwa kukaDarren Johnson noVuyo Letlapa kufakazela ukuthi lo mqeqeshi usayibhekisisa iBetway Premiership ngale kwamaqembu amakhulu.
Lime kanje leli qembu selilonke:
- Onozinti: Ronwen Williams, Ricardo Goss, Sipho Chaine, Renaldo Learner, Darren Johnson.
- Abadlali basemuva: Khuliso Mudau, Olwethu Makhanya, Nkosinathi Sibisi, Thabang Matuludi, Deano Van Rooyen, Vuyo Letlapa, Tylon Smith, Aubrey Modiba, Khulumani Ndamane, Ime Okon, Samukelo Kabini, Mbekezeli Mbokazi
- Abadlali basesiswini: Teboho Mokoena, Jayden Adams, Thalente Mbatha, Ndamulelo Maphangule, Mtheleli Mthiyane, Luke Le Roux, Siphephelo Sithole, Bongokuhle Hlongwane
- Abaphambili: Oswin Appollis, Tsepang Moremi, Evidence Makgopa, Lyle Foster, Iqraam Rayners, Rele Mofoleng, Themba Zwane, Patrick Maswanganyi, Yanela Mbuthuma, Mohau Nkota, Thapelo Morena, Kamogelo Sebelebele.
