Ihlazo elibi umqeqeshi eshisa impama kumdlali
Kuqubuke isiphithiphithi kwiPremier Soccer League yaseZimbabwe ngoMgqibelo ngesikhathi umqeqeshi weNgezi Platinum Stars uTakesure Chiragwi ehlaba omunye wabadlali bakhe ngempama.
Lokhu kwenzeke ngemuva kokuthi lo mqeqeshi ekhishwe ngekhadi elibomvu ngesikhathi bebhekene neDynamos enkundleni yodumo iRufaro Stadium.
UChiragwi, ophinde abe yiphini lomqeqeshi weqembu lesizwe laseZimbabwe, udinwe wagana unwabu ngomzuzu ka-34 ngesikhathi iDynamos ishaya lokulinganisa kuba ngu 1-1.
Umqeqeshi weNgezi ubhoke ngolaka ephikisana naleli goli, ethi kunomdlali wakhe obedlaliswe kabi ngaphambi kokushaywa kwaleli goli.
Ube eseshaywa ngekhadi elibomvu ngokulwisa kwakhe unompempe. Ngesikhathi esalwa, umdlali obesebhentshini uMacdonald Makuwe ube esesukuma eyozama ukumkhuza.
Kube usezithintele njengoba uChiragwi evele wakhwela wadilika kuye, qede wamdonsa ngogesi wempama kubuka abalandeli kanti namakhamera kamabonakude abebheke kubo.
Amalungu ethimba labaqeqeshi abeshaqekile abe esephuthuma ukuyomvimba, wabe esephelezelwa ephuma enkundleni ukuyobuka umdlalo esehlezi nezihlwele.
Lo mdlalo obushubile ugcine uphele ngo 1-1, okuwumphumela osize iDynamos yaphuma endaweni yokugawulwa yizembe.
Ekhuluma nabeSoccer24 ngemuva komdlalo, umqeqesi uChiragwi ukhale ngokuthi umoya bewuphezulu ngesikhathi kwenzeka lesi sigameko kodwa akangaxolisa.
“Ibhola ngumdlalo wemizwa. Kube nezinxushunxushu yonke indawo… Angazi ukuthi yini ebe seyenzeka ngemuva kwalokho,” kusho yena.
“Ngisho nabaqeqeshi abaphezulu emhlabeni bangenza into efanayo esimweni esifanayo. Kodwa akukho lutho olungathethelela leso sigameko.”
WINA | Ithuba lokuwina neVicks neLisenethini
Ukuziphatha kukaChiragwi sekuqubule izimpikiswano njengoba abaningi bemsola ngalesi senzo kwazise uyiphini lomqeqeshi eqenjini lesizwe.
INgezi Platinum Stars, lapho owayengumdlali wasesiswini weKaizer Chiefs, uTinashe Nengomasha, eyimenenja khona, ayikasikhiphi isitatimende esisemthethweni.
Lesi siga esishaqisayo siza ngemuva kwezinsuku ezimbalwa kuke kwaba nelinye ihlazo lokungaziphathi ngendlela ebholeni laseZimbabwe.
FUNDA NALA | UKaze ucikwe ukubuzwa ngekusasa kwiChiefs
Isikhulu seYadah FC, okuke kwadlala kuyo uKhama Billiat, uSpencer Muvadi, simiswe kuyo yonke into ephathelene nebhola.
Lokhu kwenzeke ngemuva kokuthi ehlukumeze unozinti wakhe uGodknows Gurure ngemuva kokuthi ededele amagoli awabone elula.
