Cardoso v Mokwena: Ubani ibhoza? Izinombolo aziwaqambi amanga

U-Miguel Cardoso usefinyelele esibalweni esifanayo semidlalo nephethwe ngu-Rulani Mokwena njengomqeqeshi kwiMamelodi Sundowns.

UCardoso uphathe umdlalo wakhe ka-91 ngesikhathi iSundowns ibhekene neGolden Arrows kwiMTN8 ngeSonto.

AmaBrazilians anqobe ngo-3-2 emlenzeni wesibili womdlalo owandulela owamanqamu.

UCardoso waqala umsebenzi kwiSundowns ngoDisemba 2024, ethatha indawo kaManqoba Mngqithi.

UMokwena uphathe imidlalo engu-91 njengomqeqeshi oyinhloko phakathi kuka-Okthoba 2022 noJuni 2024.

Bobabili lba baqeqeshi babe nemiphumela emihle ngesikhathi sabo kwiSundowns.

UMokwena unqobe imidlalo engu-60, wadlala ngokulingana engu-22, wahlulwa eyisishiyagalolunye.

Lokhu kumnikeze izinga lokunqoba elingu-66%.

ISundowns yawina i-African Football League yokuqala ngaphansi kukaMokwena.

Uphinde wahola iqembu lathatha isicoco seBetway Premiership ngomehluko omkhulu wamaphuzu.

ISundowns yaqeda ihamba phambili ngamaphuzu angu-23 kwizimbangi zayo ngesizini ka-2023/24.

Kwisizini yakhe yokuqala njengomqeqeshi oyinhloko, yawina iligi ngomehluko wamaphuzu angu-16.

Nokho, u-Rulani Mokwena waphoxeka emidlalweni emibili yamanqamu ngesizini ka-2023/24.

ISundowns yahlulwa yi-Orlando Pirates kowamanqamu eMTN8 noweNedbank Cup.

U-MIguel Cardoso yena uusenqobe engu-58, wadlala ngokulingana engu-20 futhi wahlulwa kwengu-13 emidlalweni engu-91.

Izinga lakhe lokunqoba limi ku-64%.

Lo mqeqeshi wasePortugal wawina iBetway Premiership ngamaphuzu angu-12 ngesizini yakhe yokuqala.

Uphinde wafaka iSundowns kowamanqamu kwiCAF Champions League.

Nokho, iPyramids yanqoba ngo-3-2 sekuhlanganiswe imiphumela yayo yomibili imidlalo.

Ngesizini edlule, uCardoso walahlekelwa yisicoco seBetway Premiership esithathwe yi-Orlando Pirates ngephuzu elilodwa.

Ube esephendula ngokuhola iSundowns yanqoba iCAF Champions League.

Lesi bekuyisicoco sesibili seCAF Champions League emlandweni weSundowns.

UCardoso usefinyelele kowamanqamu wakhe wokuqala wendebe yasekhaya neSundowns.

AmaBrazilians azobhekana nePirates kowamanqamu kwiMTN8.

Izibalo ngemuva kwemidlalo engu-91

Rulani Mokwena: Unqobe 60, wadlala ngokulingana engu-22, wahlulwa 9 = 66%

Miguel Cardoso: Unqobe 58, wadlala ngokulingana 20, wahlulwa 13 = 64%

Ngokwezibalo, u-Rulani Mokwena uhamba phambili kancane ngemuva kwemidlalo engu-91.

Nokho, u-Migule Cardoso usevele unesicoco seCAF Champions League phakathi kwezinto azizuzile kwiSundowns.

*Lo mbiko uthathwe kwiKickOff.Com