Bakhonjwa kwelikaRulani abagadli abagaqelwe awePSL

Abagadli ababili okubebkwe ngabomvu ukuthi bazophelela kuliphi iqembu sekungase bavumbuke kwiPyramids FC kaRulani Mokwena.

Ngokombiko weSABC Sport, bobabili uPeter Shalulile noTshegofatso Mabasa sebebekwe ezithebeni zePyramids.

IPyramids ibheke ukuqinisa ukuhlasela kwayo kulandela ukuhamba komgadli waseDR Congo, uFiston Mayele, ophelelwe yinkontileka.

UShalulile ufuna ukuqhubeka nokudlala phesheya ngemuva kokwehluleka kwezingxoxo zakhe namaqembu aseNyakatho Afrika, i-Esperance neWydad Casablanca, ekuqaleni kwalo nyaka.

Lo mgadli waseNamibia ushiye iSundowns engomunye wabashaye amagoli amaningi emlandweni waleli qembu, elandelana noDaniel “Mambush” Mudau.

Ngakolunye uhlangothi, uMabasa uqede ingxenye yesibili yesizini edlule ebolekiswe kwiStellenbosch FC yi-Orlando Pirates.

Nokho, wehlulekile ukuvumelana ngemigomo yenkontileka entsha naleli qembu, okumenze abe ngumdlali okhululekile.

Kubikwa ukuthi njengamanje uziqeqesha yedwa njengoba esafuna iqembu elisha.

Imithombo iveza ukuthi amagama kaShalulile noMabasa asefikile kubaphathi bePyramids njengabagadli okungase kuqiniswe ngabo ngaphambi kwesizini entsha.

Kodwa akukacaci ukuthi u-Rulani Mokwena uzofuna yini ukuphinde asebenze nanoma yimuphi kubo e-Egypt.

• FUNDA NALA | UCross uveza akufice kwiChiefs ebuya kweyoMhlaba

Yize bomabili laba badlali benentshisekelo evela emaqenjini eBetway Premiership, kubikwa ukuthi abakubeke phambili ukuthola amathuba okudlala ngaphandle kweNingizimu Afrika.

Njengoba iwindi lokudayiselana ngabadlali lisavuliwe, kulindeleke ukuthi u-Rulani Mokwena athathe isinqumo maduze mayelana nokusayinisa omunye walaba bagadli.

• EZISHISAYO| Cofa lapha usithole kuWhatsApp