AwePSL abanga uButhelezi osanda kulaxazwa yiPirates
Sekunamaqembu amaningana okuvela ukuthi agaqele unozinti osanda kwehlukana ne-Orlando Pirates u-Melusi Buthelezi.
Njengamanje kuvela ukuthi yiSekhukhune United ehamba phambili emjahweni wokusayina lo nozinti okumangazile ukukhululwa kwakhe kweziMnyama.
Ngokombiko we-iDiski Times, iBabina Noko ibona uButhelezi njengomdlali ongavala isikhala esishiywe nguRenaldo Leaner, osanda kujoyina iKaizer Chiefs.
I-Orlando Pirates imemezele ngoLwesihlanu ukuthi isihlukene no-Melusi Buthelezi ngemuva kweminyaka ecishe ibe mithathu ekuyo.
Ngesikhathi ekwiPirates, lo nozinti oneminyaka engu-28 ubudala ubebhekene nombango onzima wejezi noSipho Chaine, ongumdlali weBafana Bafana.
Lokhu kwenze wagcina engalitholi kahle ithuba lokudlala kule minyaka ayihlale kwiPirates.
Nokho, ngesikhathi sakhe kwiPirates, uButhelezi udlale imidlalo engu-22 kuyo yonke imiqhudelwano.
Akangenelwanga goli emidlalweni engu-12, kanti ushayelwe amagoli angu-14 kuphela kuyo yonke imidlalo ayidlalile.
Lo nozinti wajoyina iPirates esuka kwiTS Galaxy kanti ushiya amaBhakabhaka ephethe izindebe ezine, okubalwa iBetway Premiership, iNedbank Cup, iMTN8 neCarling Knockout Cup.
Kubikwa ukuthi iSekhukhune ikholwa ukuthi ulwazi, amava nekhono likaButhelezi kungayisiza kakhulu njengoba ilungiselela isizini entsha.
- FUNDA NALA | Umndeni uphawula ngokushona kuka-Adams
Uma izingxoxo ziphumelela, uButhelezi angase aqhubeke nokudlala kwiBetway Premiership egqoke imibala yeBabina Noko ngesizini ezayo.
Futhi njengoba uhambo lwakhe ne-Orlando Pirates sekufike ekugcineni, sekubhekwe ngabomvu ukuthi u-Melusi Buthelezi uzophelela kuliphi iqembu.
- EZISHISAYO|Â Cofa lapha usithole kuWhatsApp
