Sebesola ukuthi iChiefs iyithenge isesakeni kuDa Silva
Umgadli omusha weKaizer Chiefs uFlávio Silva usephenduke undabamlonyeni kubalandeli — kodwa hhayi ngendlela enhle.
Uyinki cishe awukomi nakahle enkontilekeni yakhe, futhi isizini ayikaqali kodwa lo mgadli usebukwa ngeso lenkunzi abalandeli.
Abalandeli baMakhosi sebeqalile ukushaya amakhala nokuveza ukungagculiseni ngalo mgadli osayinwe kwiPersebaya Surabaya yase-Indonesia.
Ngemuva kwemidlalo yobungani emithathu yokulungiselela isizini, abanaye babalandeli sebefuna lo mgadli ongowokuzalwa eGuinea-Bissau akhululwe.
Abalandeli beKaizer Chiefs sebehlulekile ukuzibamba — sebengene ezinkundleni zokuxhumana baveza ukukhungatheka kwabo ngoDa Silva.
“Noma ngabe ngubani lo ohlonze uFlavio Silva kumele agqunywe ejele!
“Akakwazi ngisho nokulawula ibhola ngendlela efanele — uthole ithuba lokukhahlelea ipali.
“Kodwa yena wavele walibhamuza laqonda ezihlahleni zaseNetherlands. 😂,” kubhala u-@LindoMyeni.
U-@BiGWiZ_ yena wenanele wathi: “UFlávio Silva? Yehh. Ngiyaqonda kusalungiselelwa isizini, kodwa lo bhuti akakwazi ngisho nokuwalula ibhola 😭.”
Abanye baveze ukungabaza inqubo yokuhlonza abadlali yekilabhu ngalokhu abakubona kuSilva.
“Kulula ngempela ukuqola iKaizer Chiefs. 😭😭,” ubhale kanjeu-@InnoMercy_T efake ividiyo yalo mdlali ehluleka ukubamba ibhola.
Abanye sebevele befuna kuthathwe izinyathelo ezinqala, banxusa iKaizer Chiefs ikhulule uDa Silva kusemanje.
“IChiefs kumele inqamule izinkontileka zikaFlávio no-Ethan Chislett. Sengibone ngokwanele.
“Ngisho nabadlali abaphuma eqenjini le-DDC bangcono kakhulu,” kubhala u-@Arthursphere.
Abanye abalandeli bancokole ngokuthi noma ngubani omhlonzile cishe usebenzise umakhalekhukhwini omdala ukubukela amavidiyo akhe.
“Umhlaziyi owahlonza uFlavio Silva kwi-@KaizerChiefs cishe usebenzise ikhamera ye-@nokia 1100 ayhhiiii ayi ayikho phela lento,” kubhala u-@ya_lethabo.
U-@KhulekaniB67495 yena uthe, “U(Naledi) Hlongwane ungcono ngokuphindwe ka-10 000 kunoFlávio.”
Noma kunjalo, abanye abalandeli bathi imidlalo yobungani akufanele ithathwe njengento ebaluleke kakhulu.
“Ngizodinga ukuthi uFlávio Silva ayeke ukucasha futhi asibonise lokho akwazi ukukwenza ngampela.
“Ngiyameseka mina,” kubhala u-@Aubreychiibi.
UDa Silva ubukeka engeke ebe naso isikhathi njengoba abalandeli sebeqalile ukungayizwa eyakhe.
Okuzomele akwenze wukuthi uma kuqala isizini, adabule inethi zisuka nje.
