Awe-PSL embangweni womgadli waseBotswana

Amaqembu amabili eBetway Premiership kuthiwa asekhombise intshisekelo kumgadli waseBotswana oke walunguza kwiChippa United uThatayaone Kgamanyane. 

Njengamanje lo mdlali waseBotswana usemabhukwini eGaborone United khona kwelakubo.

Ngokwemibiko yaseBotswana, iMarumo Gallants isivele iziqalile izingxoxo neGaborone, iveza isifiso sokudayiselwa lo mgadli engu-29 ubudala. 

Ifuna lo mgadli waseBotswana nje kulandela ukuthi ihlukane noGabadinho Mhango obekuthenjelwe kuye emagolini kule sizini.

Nokho izingxoxo neGaborone zibonakala zindandazela ndawonye njengoba la makilabhu womabili engavumelana ngemali yokudayiselana.

UKgamanyane usanda kuqeda isizini ebe yinhle kuye la eshaye khona amagoli angu-15.

Nguye obe ngumgadli ohambe phambili ngamagoli kwiligi enkulu yaseBotswana. 

Ifomu yakhe isimenze umdlali ohalelwa amaqembu amaningi. Akuyona iGallants yodwa emfisayo. 

ISekhukhune United nayo kubikwa ukuthi isiqaphile isimo sakhe futhi ingase ifake esayo isicelo maduze.

UKgamanyane akayena umdlali ongaziwa kwiPSL. Udlale isikhathi esifushane kwiChippa United ngo-2018.

Wahlala izinyanga coshe eziyisithupha wabe esebuyela kwelakubo la efike wajoyina khona iGaborone United. 

• FUNDA NALA | Bayisikhombisa abangaphandle abamataniswa neKaizer Chiefs 

Imininingwane yenkontileka yakhe nobude bayo kwiGaborone abucaci. 

Nokho kuthiwa le kilabhu ayizimisele ukumdedela ngaphandle uma kubekwa into ecacile etafuleni layo.

IGallants ihlose ukuqinisa iqembu layo ukuze yenze kangcono ngesizini ezayo. 

• SITHOLE NAKU-FACEBOOK | Lisenethini.co.za 

Ukuthola umgadli onamava njengoKgamanyane kungase kuyinike ukuqina ekudingayo.

• JOYINA | SineGroup kaWhatsApp

Kodwa konke kubukeka kuncike ekutheni ikwazi ukukhipha inkece ezojabulisa iGaborone.