UYoussef nakulindele kwabeKaizer Chiefs kowePolokwane
Umqeqeshi weKaizer Chiefs, uKhalil Ben Youssef, ukubeke kwacaca ukuthi asikho isikhala sokudembesela eqenjini labo.
Lokhu njengoba ezakhe zibheke emdlalweni obalulekile weBetway Premiership nePolokwane City ngoMgqibelo ntambama.
Amakhosi abophele isikimu esicishe sifane naleso esishaye iMagesi FC ngo 4-1 enkundleni efanayo ngoLwesithathu.
Leli qembu leNaturena liphindela e-Old Peter Mokaba Stadium lihambela phezulu nokuzethemba kuphezulu.
UBen Youssef ugcizelele ukuthi iqembu lakhe libhekana nayo yonke imidlalo sengathi ngowamanqamu.
“Ngesikhathi siqala isizini, sathi sizobhekana nayo yonke imidlalo njengomdlalo wendebe,” kusho yena.
“Yonke imidlalo inzima, futhi kufanele silwe. Okubaluleke kakhulu ukugxila kithina nokusebenza kwethu.”
IKaizer Chiefs ivule igebe lamaphuzu ayisithupha kuMaZulu FC. Uma iphinde inqoba, lokho kuzoqinisekisa indawo yayo emjahweni wokuhlungela imiqhudelwano yeCAF.
Abophele kanje Amakhosi: Petersen – Cross, Monyane, McCarth, Msimango – Cele, Maboe, Shabalala, Lilepo – Silva, Duba
Ebhentshini: Bvuma, Frosler, Miguel, Mthethwa, Ngcobo, Sirino, Mayo, Vilakazi, Baartman
Njengoba umfutho uqinile ohlangothini lwayo, iKaizer Chiefs izobheka ukwethula esinye isitatimende njengoba isondela ekuqedeni kwabathathu abaphezulu.
