UTso Vilakazi uzincoma ‘ngokuvuselela’ uShabalala weChiefs
Owayengumdlali -Orlando Pirates, uBenedict ‘Tso’ Vilakazi, usedalule izeluleko zakhe azinike umdlali weKaizer Chiefs uMduduzi Shabalala ngaphambi komdlalo wamanqamu weNedbank Cup.
UTso Vilakazi uthi ujabule ngendlela uMduduzi Shabalala adlale ngayo kulo mdlalo obuseMoses Mabhida Stadium eThekwini.
UShabalala ungene esuka ebhentshini ethatha indawo kaGaston Sirino ngesikhathi iChiefs ihlula iPirates ngo 2-1 kowamanqamu ngoMgqibelo.
Umthelela kaShabalala usheshe wabonakala njengoba kunguye oqale umnyakazo ophethe ngegoli likaYusuf Maart okuyilo enqobe ngalo iChiefs.
UTso Vilakazi uthi akazange agwegwese ngesikhathi ekhuluma noMdu Shabalala oneminyaka engu-21 ubudala ezinsukwini ezimbalwa ngaphambi komdlalo.
“Ngikhulume naye ngathi, ‘mfana wami, udinga nje ukuba nguwe emdlalweni futhi wenze lokho okwaziyo. ‘Ngiyazi ukuthi kunzima kwesinye isikhathi’,” kusho uTso kwi-IDiski TV.
“‘Kwesinye isikhathi uthola ukuthi ufuna ukuzama okuthile kodwa kungasebenzi… okubalulekile wukuthi wena njengomuntu uzinikele, uqhamuke necebo’.
“Ungiphendule wathi, ‘Grootman, kunzima ngoba ngezinye izikhathi udinga usizo kodwa ngalutholi’.
“Ngibe sengimtshela ukuthi njengomdlali okhokhelwayo uma ukuleso simo udinga ukusebenza kanzima, ukhombise lokho okwaziyo ukukwenza.
“Bengiqonde ukuthi siyabona ukuthi umfana uyazama kodwa akanakho ukwesekwa…
“Usebenzile umfana futhi yilokhu esifuna ebesikufuna kuwe, ukuthi yebo akukho mnyakazo kodwa uzame okuthile.
“Bengicabanga ukuthi sebeyilahlile ngesikhathi ebuyela emuva kodwa kwenzeka ukuthi ibhola liye ku-Ashley Du Preez obe eselibuyisela kukaputeni”.
