UMthandeni Manqele nesicelo kubalandeli beChiefs ngeBafana
Umculi kaMaskandi odumile, u-Mthandeni Manqele usekhiphe isicelo kubalandeli be-Kaizer Chiefs.
Lo mculi ubone kufanele angenelele ngemuva kokuthi abalandeli baleli qembu benqume ukuduba iBafana Bafana.
Lokhu kulandela ukuthi abadlali baleli qembu elizinze eNaturena begajiwe eqenjini leBafana eliyakwiNdebe yoMhlaba eMexico.
Abanye babalandeli sebeze bakubeka kwacaca ukuthi bazokweseka noma liphi iqembu elizobhekana neBafana kulo mqhudelwano.
Yingakhio-ke u-Mthandeni Manqele, naye ongumlandeli wokuqina we-Kaizer Chiefs esenxuse ozakwabo ukuba bajike ukucabanga ngeBafana.
“Ngiyanicela phela balandeli beKaizer Chiefs yami enhle eMpofu,” kubhala uMthandeni kwiFacebook.
“Asithandeni iBafana Bafana yethu, siyinikeze ukwesekwa kwiNdebe yoMhlaba ukuze ishaye igoli noma amabili…
“Asenzele yena umfana wethu lo uBradley Cross. Ngiyanicela,”
UCross nguyena kuphela umdlali waMakhosi oqokiwe eqenjini likaHugo Broos, kanti abalandeli bakhombise ukumthanda.
Bebememeza igama lakhe ngesikhathi iBafana idlala ngokulingana ngo 0-0 neNicaragua ngempelasonto edlule.
Nokho ukusala kukanozinti uBrandon Petersen yikho okucike kakhulu abalandeli baMakhosi.
Lo nozinti ube nesizini enhle kakhulu kanti ubekhona eqenjini labangu-32, kodwa wasala uma sekuqokwa abangu-26 abaya kwiNdebe yoMhlaba.
