UTso ubalula akuthanda ngo-Ighodaro kwiKaizer Chiefs
Owayeyisihlabani se-Orlando Pirates uBenedict “Tso” Vilakazi usencome umgadli weKaizer Chiefs u-Etiosa Ighodaro ngemuva kokudlala kahle kwakhe kwiCaf Confederation Cup.
U-Ighodaro ushaye igoli lakhe lokuqala egqoke imibala yaMakhosi ngesikhathi iKaizer Chiefs ishaya i-AS Simba ngo 3-1 eDobsonville Stadium ngeSonto.
Ukunqoba kuqinisekise ukuthi Amakhosi azibekisela indawo esigabeni samaqoqo kulo mqhudelwano ongowesibili ngobukhulu ebholeni lamakilabhu ezwenikazi.
UTso uthi lo mgadli waseNigeria umkhumbuza uLazarus Kambole, wengeza ngokuthi ukuba khona kwakhe kungase kube semqoka kwiChiefs kule sizini.
“Lo mgadli ungikhumbuza umdlali engimthandayo, uKambole,” uVilakazi usho kanje kwi-iDiski TV la asengumhlaziyi khona.
“Kunabadlali abathile obadingayo eqenjini noma ngabe bayadlala noma abadlali – umthelela wabo ukhona.
“U-Ighodaro ungumdlali obaluleke kakhulu kwiKaizer Chiefs. Bheka nje lamagoli — wagcina nini ukubona iChiefs ishaya amagoli amaningi kangaka?”
UVilakazi ubalule ukuthi lo mgadli oneminyaka engu-24 ubudala usazoqhubeka nokwenza impilo ibe nzima kubadlali basemuva bamaqembu eBetway Premiership.
“Usazoqeda amaqembu lo mfana — abantu basazokhala ngenxa yakhe,” kwengeza uTso.
“Uyazi, uma unikeza abadlali ithuba kuba nemithelela emibili: lowo mdlali uphakamisa iqembu noma aliwise. U-Ighodaro uliphakamisile.”
FUNDA NALA | IPSL isikhiphe imininingwane yeyeCarling KO
Kulindeleke ukuthi u-Ighodaro aphinde ahole ukuhlasela kweKaizer Chiefs uma seyibhekene neDurban City eMoses Mabhida Stadium ngoLwesihlanu.
Lamaqembu azogadulisana emdlalweni weBetway Premiership obhekwe ngabomvu ngo-7.30 ebusuku.
