UStuart Baxter ushwebile kowokuhola iZimbabwe kwi-Afcon
Udaba ngu-Alfred Ngubane
Owayengumqeqeshi weKaizer Chiefs neBafana Bafana uStuart Baxter ungomunye wabaqeqeshi abebefake izicelo zomsebenzi weqembu lesizwe laseZimbabwe.
Yize ebesohliwni lwabokugcina obekuhlungwa kubo, lo mqeqeshi akazange anikezwe lesi sikhundla.
Lo msebenzi okuvela ukuthi ububhekwe abaqeqeshi abaningi ugcine unikezwe uMarian Morio Marinica waseRomania.
UMarinica, owake waqeqesha iLiberia neMalawi phambilini, ungena esikhundleni somqeqeshi waseGermany uMichael Nees osanda kuxoshwa.
UNees uchithwe ngemuva kokwehluleka ukufaka iZimbabwe eNdebeni yoMhlaba ka-2026, yize ekwazile ukuyifaka kwiCaf Africa Cup of Nations (Afcon) ka-2025 eseMorocco ngoDisemba.
UStuart Baxter, onomlando omude ebholeni lase-Afrika, waqala ukuphatha iBafana Bafana ngo-2004, waphinde wabuyela kuyo ngo-2017.
Nokho wehlulekile ukuletha impumelelo ngehlandla lakhe lesibili, wabe esekhonjwa afike ngayo.
Ngaphambi kwalokho wayebe nempumelelo ebonakalayo kwiKaizer Chiefs, enqoba izicoco ezimbili zeligi neseMTN8.
Ihlandla lakhe lesibili naleli qembu laseNaturena ngo-2021 nokho alizange libe yimpumelelo futhi ushiye sekumuncu.
ENingizimu Afrika lo mqeqeshi uke wasebenza nakwiSuperSport United, ngemuva kwalokho wabuyela e-Europe la asesebenze khona emazweni ehlukene.
FUNDA NALA | Adayiswe aphela awe-Arrows/Pirates
Manje, umzamo wakhe wokuphinda abuyele ebholeni lase-Afrika ngeZimbabwe awuphumelelanga.
Inhlangano eyengamele ibhola eZimbabwe ibone uMarinica kunguye ofanele ukuhola iWarriors njengoba iqala isahluko sayo esilandelayo.
ZITHOLE ZISHISA: Cofa lapha usithole kwiWhatsApp Channel yethu
