USiboniso Masango uveza okwenze ahlenge owe-Esperance
Umlandeli weMamelodi Sundowns, uSiboniso Masango, usenconywe njengeqhawe ngesenzo sakhe ngesikhathi kunesiqephu esingesihle sodlame eLoftus Versfeld.
USiboniso Masango ubeke impilo yakhe engcupheni ukuze asindise umlandeli we-Esperance obelenga esitezi sesihlanu senkundla.
Lokhu bekungemuva kokuqubuka kwempi yabalandeli kulandela ukunqoba kweSundowns ngo 1-0 ihlula iqembu laseTunisia emdlalweni weCaf Champions League ngoLwesibili ntambama.
USiboniso Masango ukhulume ngokwenzekile kwiMetro FM, eveza ukuthi le ndoda ayisindisile igama layo ngoChristian.
Lo mlandeli obelengela ekufeni uqale wesabela impilo yakhe ngesikhathi uMasango eza kuye.
“Ngesikhathi ngigijima ngiya kuye, ubecabanga ukuthi ngizomphusha,” kukhumbula uMasango.
“Ubekhala engincenga ethi unezingane ezintathu futhi akakwazi ukufa manje.”
Kuqubuke isiphithiphithi kubalandeli, kanti abalandeli be-Esperance bebelwa nabodwa njengoba abanye bebezama ukukhuza nje.
Ngesikhathi sale nxushunxushu, uChristian ududulekile, wazithola eselenga esitezi esingezansi futhi esengozini embi.
Kuvuke umzwelo kuMasango. Uthi uzwe egazini ukuthi kufanele athathe isinyathelo ngokushesha njengoba ezwa ukuthi lo muntu angase afe.
“Ngimbone elenga, kwavuka uzwelo kimi ngibona sengathi ozofa,” kuqhuba uMasango.
“Ngimbambe ngengalo, kodwa ubeshibilika ngoba belina. Yena ngaleso sikhathi ubecabanga ukuthi ngizama ukumsunduzela phansi.”
Njengoba bekunzima, uMasango uthi uphendukele kubalandeli be-Esperance abaseduze ecela bazomlekelela, kodwa esikhundleni sokumsiza bamjikijela ngamabhodlela.
Naphezu kwalokho, uSiboniso Masango akayekanga, ukubekile ezama ukudonsa uChristian.
“Ngibe sengidonsa ubhakha wakhe, futhi ekugcineni, kwalunga. Ngemuva kokuba esephumile, uvele wakhala.
“Nami ngifikelwe umuntu, sakhala sobabili. Ubengibona ethi, ‘Usindise impilo yami.’”
Isenzo esikhombise isibindi nobuntu sikaSiboniso Masango sesinconywe kakhulu cishe yonke indawo.
Isinqumo sakhe sokuzidela ukuze asize, ngisho nalapho ukuphepha kwakhe kusengozini, sibonisa umoya wezemidlalo nobuntu.
