Kuvela imali eshisiwe ekhokhwe yiDowns ngoSales

• Intatheli yeLISENETHINI

IMamelodi Sundowns kubikwa ukuthi ikhokhe imali eningi ngomdlali oyedwa kunaleyo ebibekwe yiKaizer Chiefs ukuthenga abadlali abasha kuleli windi lokudayiselana ngabadlali. 

Ngokwemibiko, iChiefs ibibeke eceleni imali elinganiselwa ku-R60 million ukuze isayinise abadlali abasha. 

Ngaleso sikhathi, iSundowns ikhokhe u-R61 million ngomdlali ohlaselayo waseBrazil u-Arthur Sales.

U-Sales, oneminyaka engu-22 ubudala, ujoyine iSundowns esuka kwiLommel SK, ikilabhu yesigaba sesibili saseBelgium. 

Lokhu kutshalwa kwezimali kugqamisa isu leSundowns nenhloso yayo yokuqinisa iqembu labo ukuze lidle izindebe emiqhudelwaneni yasekhaya neyezwekazi.

ISundowns ayiyintsha ekukhokheni imali eshisiwe, ikakhulukazi ukuthenga abadlali baseSouth America. 

Ngesizini edlule isayine umdlali wasesiswini waseChile uMarcelo Allende ngemali okubikwa ukuthi ingaphezu kuka-R40 million. 

U-Allende usekukhombisile ukuthi ayilahlekanga leyo mali njengoba esephenduke omunye wabadlali abamqoka eqenjini. 

Ngaphandle kuka-Allende, iSundowns iphinde yasayina umdlali wasesiswini wase-Argentina uMathias Esquivel. 

Kodwa-ke, ngemuva kokuchitha izinyanga eziyisithupha neqembu, u-Esquivel usebuyele emuva kwiCA Talleres, iqembu abethengwe kulo e-Argentina. 

Ukuhlala kuka-Esquivel eNingizimu Afrika kube okwesikhashana, okwenz akube nemibuzo ngokuthi ngabe iSundowns ayilahlanga yini imali yayo ngaye. 

Kuvela ukuthi wacela ukubuyela ekhaya ngoba umndeni wakhe ungakwazi ukuphila ngaphandle kwakhe, wabe esebolekiswa eqenjini lakhe lakudala. 

OLUNYE UDABA: URoo ufuna kuqheliswe abalandeli ‘ekhishini’ likaNabi

Omunye umdlali waseSouth America olandwe yiSundowns muva nje nguLucas Ribeiro ofike waba nomthelela obonakalayo eqenjini.