URoo ufuna kuqheliswe abalandeli ‘ekhishini’ likaNabi
- Alfred NGUBANE
ULucas “Rhoo” Radebe, oyinkakha yeKaizer Chiefs neBafana Bafana ubona izimpawu ezinhle eqenjini lakhe lakudala.
IChiefs ayiconsi kubalandeli bayo kusukela inqobe umdlalo wayo wokuqala kwiBetway Premiership ngempelasonto edlule.
Leli qembu, eselingaphansi komqeqeshi, uNasreddine Nabi, liguqise iMarumo Gallants ngo 2-1 kanti libuye kade selilandela ngemuva.
“Ngibona ibhodwe eliphekwa nguNasraddine Nabi lishube kakhulu,” kusho uRadebe.
“Kodwa kuzomele abalandeli baqhele ebhodweni ngoba bazofuna ukuthi kuphakwe ibhodwe lingakavuthwa.”
URoo, ongomunye wabadlali abazakhela igama kwiChiefs, bagcina behlonishwa emhlabeni jikelele, uthi mkhulu umehluko okhona eqenjini likaNabi.
“Abadlali beKaizer Chiefs bakhombisa ukulambela ukudlala manje kunangesizini edlule,” kuqhuba uRadebe.
“Ngicabanga ukuthi emidlalweni emthathu elandelayo yeKaizer Chiefs sizobona umehluko omuhle kakhulu.”
Okunye okuthinta uRadebe kwamancane wukuthi uNabi ukhombisa isibindi ngokunika abadlali abancane ithuba.
Emdlalweni weGallants, uNabi uqale ngoMduduzi Shabalala noSamkelo Zwane futhi badlale kahle kakhulu.
Ubuye washintsha, wafaka oMfundo Vilakazi noWandile Duba esiwombeni sesibili. Amagoli abanqobe ngawo ashaywe uShabalala noVilakazi.
“Ngithanda ngoba uNabi uyakholelwa kubadlali abancane abanjengoMduduzi Tshabalala, Mfundo Vilakazi, noSamkelo Zwane.
“Kuzoba ngumthwalo kubadlali abalimele nabangazimiseli ukuthola ijezi,” kuchaza uRadebe.
“Uyabona ukuthi abadlali aqale ngabo uNabi emdlalweni wokuvula isizini bakhombise izimpawu zokuvuthwa.”
Umdlalo weChiefs olandelayo uzoba seThekwini kanti kulindeleke igcwale phama iMoses Mabhida ngoSepthemba 25.
OLUNYE UDABA: IDowns ‘iwise ugesi’ kusajuxuzwa eNaturena
Izobe ivakashele AmaZulu FC ayiqale ngebatha isizini eshaywa yiPolokwane City ngo 2-1 ekuhambeni.
