Ushaya amakhala ngabalaxazwe yiPirates, bacoshwa yiChiefs
Owayeyiphini lomqeqeshi wkiKaizer Chiefs phambilini, uFarouk Khan, usezwakalise ukukhathazeka ngesinqumo seqembu sokusayinisa abalaxazwe yi-Orlando Pirates.
IKaizer Chiefs kubikwa ukuthi isukume ngokushesha ukuze isayinise uPaseka Mako noThabiso Monyane ngemuva kokuthi i-Orlando Pirates ibalaxazile ngaphambi kwesizini ka-2025/26.
Laba badlali ababili abadlala emuva bajoyine Amakhosi mahhala ngemuva kokuthi iPirates ikhethe ukungazivuseleli izinkontileka zabo, eziphela ngoJuni 30.
UMako uchithe amasizini ayisikhombisa kwiPirates, wadlala imidlalo engu-173 kuleso sikhathi.
UMonyane yena uhlale iminyaka emihlanu ngemuva kokukhushulelwa eqenjini elikhulu esuka enkulisa yeqembu ngo-2019.
Yize bobabili laba badlali befika namava, uKhan ubuze ukuthi ngabe bangabadlali abafanele yini kwiChiefs.
“Ukube besezingeni lokuba nomthelela ofanele, kungani iPirates ibadedelile?” uKhan ucashunwe ebuza kanje kwiFARPost.
“Uma wakha iqembu kabusha, udinga abadlali abasebancane abazokhulela ngaphakathi ohlelweni lweqembu.
“Ngicabanga ukuthi amaqembu amaningi azama ukonga ngokungachithi imali ekuthengeni abadlali.
“Kodwa lokho kunomthelela omubi ngokuhamba kwesikhathi,” kuchaza uKhan.
UKhan, owasiza ekuthuthukiseni abadlali abafana noJabu Mahlangu noJunior Khanye ngesikhathi ekwiChiefs, ukholwa ukuthi uMako noMonyane bangabadlali abahloniphekile.
Kodwa ucabanga ukuthi kungenzeka laba badlali abasuka kwi-Orlando Pirates bangabi yisixazululo abalandeli beKaizer Chiefs abasilindele.
“Bangabadlali abahle khona, akungatshazwa lokho,” kwengeza lo mqeqeshi osengumhlaziyi kwaSuperSport TV.
“Kodwa bangakwazi yini ukuphakamisa izinga leqembu elikhona njengamanje kwiChiefs?
“Lokho kuzobonakala ngokuhamba kwesikhathi. Kodwa ekilabhini efana neChiefs, udinga abadlali abazokwazi ukuphakamisa iqembu lonke.”
Njengamanje isiqalile amalungiselelo ayo esizini entsha, kanti maduze izohambela eNetherlands la iyozicijela khona.
Kulapho ke uMako noMonyane nabanye abadlali abasha okulindeleke ukuthi bahlanganiswe nozakwabo kuleli qembu laseNaturena.
