URiveiro akawuvali umlomo ngePirates ‘eqinile’
- Sibongiseni GUMBI
UJose Riveiro usale engawuvali umlomo ngokukhula kweqembu lakhe kwi-Orlando Pirates njengoba ethi lihlangana ngale ndlela ayifunayo.
IPirates ichaze uRiveiro nabalandeli bayo ibhubhudla iDisciples FC yaseMadagascar ngoLwesihlanu ebusuku.
EzikaRiveiro zilidabule ngo 4-0 leli qembu emdlalweni womlenze wesibili kweyokuhlunga yeCaf Champions League.
Umdlalo womlenze wokuqala ekuhambeni wawuphele zibambene ngo 0-0 obekwenza owesibili ube bucayana kwiBucs.
Nokho amagoli angene ngesiwombe sokuqala okube ngumkhonto ogwaza ekhaya, elikaRelebohile Mofokeng elikaPatrick Maswanganyi, nelikaKarim Kimvuidi aqede konke ukusaba obekungase kube khona.
“Njengoba ubonile, bayakwazi ukudlala,” kusho uRiveiro ngemuva komdlalo.
“Banabadlali abahle, bayazimisela ngakho kunzima ukubavimba uma behlasela.
“Banezindlela zabo zokuhlasela njengoba ubonile sebesixina emizuzwini yokugcina befuna igoli.”
URiveiro uthi uchazwe yindlela abadlali bakhe abakhombise ngayo ukuzimisela nokungayenqeni inselelo abebebhekene nayo.
“Akukho okufika kalula empilweni. Nasebholeni kunjalo, kumele uyisebenzele kanzima impumelelo emdlalweni ngamunye.
“Namuhla iqembu likjhombise ukukhula ngokomqondo nokukwazi ukumelana nezimo njengoba lo mdlalo bewungelula.
“Bewungelula ngenxa yokuthi besazi ukuthi indawo yethu kwiCaf beyisengcupheni nokunye okuningi.
OLUNYE UDABA: UMaswanganyi uchaza ngokunikwa ‘iShumi’ kwiPirates
“Ngijabule kakhulu ngezinga leqembu, ikakhulukazi emizuzwini engu-30 yokuqala, manje sesidlulela kolandelayo,” kuchaza lo mqeqeshi.
