Uphinde wamangaza u-Ouaddou ebophela elePirates
Umqeqeshi we-Orlando Pirates, u-Abdeslam Ouaddou, usephinde washiya abalandeli bemangele ngendlela abophele ngayo iqembu lakhe elizodlala umdlalo obalulekile neMamelodi Sundowns.
Lezi ziqhwaga zebhola laseNingizimu Afrika zihlangana emdlalweni olindelwe ngabomvu weBetway Premiership eLoftus Stadium ngoMgqibelo ntambama.
Umdlalo uqala ngo-3.30 ntambama, kanti womabili amaqembu asebamemezele abadlali azoqala ngawo lo mdlalo okulindeleke ukuthi ushise zisuka.
Nokho okudonse amehlo yindlela i-Orlando Pirates eboshelwe ngayo njengoba u-Ouaddou esephinde wamangaza ngendlela alihlele ngayo elakhe.
Lo mqeqeshi waseMorocco wenze izinguquko ezintathu eziphawulekayo eqenjini elihlule iMagesi FC kwiCarling Knockout ngoLwesibili.
UDeon Hotto ubuyela eqenjini, ethatha indawo kaNkosikhona Ndaba kwesokunxele emuva, uSihle Nduli naye ubuyile, ethatah indawo kaPatrick Maswanganyi esiswini.
Olunye ushintsho ngoluka-Evidence Makgopa oqala lo mdlalo, engena endaweni kaYanela Mbuthuma osebhentshini.
Kodwa kube wukushiywa kwakhe ngaphandle abadlali abanamava basesiswini uThalente Mbatha noSipho Mbule osekususe izinkulumo-mpikiswano.
U-Ouaddou uqhubekile nomdlali osemncane uCamrin Dansin ozobe edlala noNduli noMasindi “John Wick” Nemtajela esiswini.
UDansin ube nomdlalo onzima bebhekene neMagesi, kanti kuke kwanesikhathi la unozinti uSipho Chaine ebonakale ekhombisa abaqeqeshi ukuthi abamkhiphe ngemuva kokwenza iphutha.
Nokho ke manje sekuyaziwa ukuthi u-Ouaddou akesabi ukusheshe enze izinguquko uma izinto zingahambi ngendlela afisa ngayo.
Begcina ukudlala neSundowns kwiMTN8, wakhipha uPatrick Maswanganyi ngesiwombe sokuqala okwashiya abaningi bemangele.
FUNDA NALA | UKhan akachazekanga yize iChiefs inqobile
Nakulokhu ngeke kumangaze uma eshesha ukushintsha uma izinto zingamhambeli ngendlela abheke zihambe ngayo.
Nakho ukugcina abadlali abanamava ebhentshini kungaba yicebo elihle elizosiza ukujika izinto ngokuhamba komdlalo.
- ISundowns ibophele kanje: Williams – Modiba, Mudau, Kekana, Cupido – Mathews, Allende, Aubass – Santos, Sales, Shalulile
- Ebhentshini: Onyango, Lebusa, Mdunyelwa, Basadien, Mkhulise, Adams, Ntsabeleng, Maseko, Rayners
- IPirates ibophele kanje: Chaine – Hotto, Lebitso, Mbokazi, Seema – Dansin, Nemtajela, Nduli – Appollis, Moremi, Makgopa
- Ebhentshini: Buthelezi, Sibisi, Ndaba, Van Rooyen, Mbatha, Mswanganyi, Mbule, Kwayiba, Mbuthuma
