Igeja lingene phansi zisuka kwiMFC

Isizini entsha yeMotsepe Foundation Championship (MFC) iqale ngendlela ejabulisayo, njengoba amaqembu amaningi ethole amaphuzu amathathu.

IReal Native, ebeyaziwa ngeCasric Stars, iqale kahle kakhulu ngemuva kokubuya isilandel ngemuva yanqoba iCape Town City ngo 2-1.

ICity yiyo ebambe phambili ngemuva kokuthi uRai Vloet eshaye iphenathi ngomzuzu ka-29. Kodwa iReal Native iphendule ngokushesha.

USphamandla Mlilo ushaye igoli lokulinganisa ngomzuzu ka-32, kwathi uXolani Slawula waqedela ukubuyela emdlalweni ngegoli lesibili ngesiwombe sesibili.

Lokhu kunike iReal Native amaphuzu amathathu ekuqaleni kwesizini.

IVenda Football Academy yona ibambane ngo 1-1 neLerumo Lions emdlalweni wokuvula isizini.

IHope FC iqale impilo yayo kwi-MFC ngendlela encomekayo.

Leli qembu laseKapa linqobe i-University of Pretoria ngo 1-0 e-Athlone Stadium.

UTauric Gamildien, osanda kusayina kuleli qembu, ube yiqhawe ngemuva kokushaya igoli elilodwa lomdlalo ngesiwombe sesibili.

IHighbury FC nayo iqale isizini ngokunqoba, ishaya i-The Bees ngo 2-1 Kanyamazane Stadium.

U-Unathi Funani nguye obe ngumdlali ovelele kulo mdlalo eshaya womabili amagoli eHighbury.

IHungry Lions neGomora United bahlukaniselane amaphuzu bebambana ngo 2-2.

ILeicesterford City nayo iqale kahle ngemuva kokunqoba i-Orbit College, ebuya kwiBetway Premiership ngo 1-0.

UModenzo Sekgobela ushaye igoli elenze umehluko, wanika iqembu lasekhaya amaphuzu amathathu.

IMagesi FC, nayo ebuya kwiPremiership, iqophe isiqalo esihle ekubuyeleni kwawo kwi-MFC ishaya iMidlands Wanderers ngo 1-0 ekuhambeni.

UNyakala Raphadu nguye oshaye leli goli lokunqoba ngomzuzu ka-13.

INorth West University FC, esanda kukhushulelwa kulesi sigaba, iqale impilo yayo kwiPSL ngokubambana ne-Upington City ngo 1-1.

INWU ishaye igoli lokuqala ngomzuzu ka-10. ICity ibhekane nobunzima ekutholeni igoli lokulinganisa.

• FUNDA NALA | Isitobha sePirates sithola ithuba elisha

Kugcine kwenzeke ngomzuzu ka-90, lapho uChalake eshaya khona igoli elisindise iqembu iphuzu.

Imiphumela yosuku lokuqala ikhombise ukuthi isizini yalesi sigaba ingaba nokuncintisana okukhulu.

• EZISHISAYO| Cofa lapha usithole kuWhatsApp