UMoloisane ufuna amaphuzu amathathu ukuze iChiefs ‘iphefumule’
U-Thabo Moloisane akakhulumi ngobuhle bebhola. Ufuna i-Kaizer Chiefs ithathe amaphuzu amathathu qha.
IChiefs izobhekana neGolden Arrows eMbombela Stadium ngeSonto ntambama, emdlalweni weBetway Premiership.
Ukhala ngamaphuzu nje uMoloisane yingoba Amakhosi adayise ngawo ibambana nePolokwane City ngo-1-1 ngempelasonto edlule.
IChiefs manje isisendaweni yesine, njengoba AmaZulu egxume ayeqa kwilogi futhi noma ingawina ngeSonto, izoya ekhefini isesendaweni yesine.
Lokhu kusho ukuthi Amakhosi asedlale imidlalo emibili ilandelana ngokulingana, emidlalweni abebona sengathi bekumele bayinqobe.
U-Thabo Moloisane ugcizelela ukuthi ukunqoba kwe-Kaizer ngaphambi kwekhefu leFIFA kubalulekile.
“Kuzobaluleka kakhulu ukuthi sithole amaphuzu amathathu,” kusho uMoloisane.
“Sidlale ngokulingana emidlalweni emibili obekumele siyinqobe.
“Manje sesiya ekhefini leFIFA, ngakho kuzobaluleka kakhulu ukuthi singene kuleli khefu sinamaphuzu amathathu.”
Uthi ukunqoba kunganciphisa nengcindezi kwiChiefs.
“Lokho kuzosisusa kancane ingcindezi emahlombe ethu, sazi ukuthi sisahambisana namaqembu aphezulu kwiligi.”
Ukungabibikho kukaBrandon Petersen, olimele edolweni ngesikhathi kuqeqeshwa phakathi nesonto, nakho akumethusi uMoloisane.
“Okokuqala, ngifisela uBiza ukuthi asheshe alulame,” kuqhubayena.
“Okwesibili, ngicabanga ukuthi sinabadlali abakwazi ukudlala kahle esigabeni sabonozinti.”
- FUNDA NALA | UKanalelo uzithintele kwiPirates eyigcona
I-Kaizer Chiefs inoBruce Bvuma noRenaldo Leaner, kanti u-Thabo Moloisane uthi akukho sizathu sokwethuka.
“Asithuki nhlobo. Inhloso yethu wukwenza isiqiniseko sokuthi iqembu liyanqoba futhi siyasekelana.”
IChiefs ibophele kanje: Leaner, Frosler, Cross, Miguel (C), Moloisane, Maboe, Mthethwa, Abrahams, Mmodi, Vilakazi, Baartman.
Ebhetshini: Bvuma, Dortley, Monyane, Mako, Mtasingwa, Shabalala, Velebayi, Chislett, Ighodaro.
- EZISHISAYO| Cofa lapha usithole kuWhatsApp
