UMokwena udedele amabhomu kubalandeli beWydad
URulani Mokwena usale ephoxekile ngabalandeli be-Wydad Athletic ngesikhathi bemjikijela yena neqembu lakhe ngemuva kokudlala ngokulingana ngeSonto.
I-Wydad ibambane ngo 2-2 neFUS Rabat eshaye igoli lokulinganisa sekusele amanenjana umdlalo uphele, nokuholele ekutheni kube nesiphithiphithi.
Umphumela wenze iRed Castle yawela endaweni yesithathu kwilogi yeBotola Pro League.
Ekhuluma ngemuva komdlalo, uMokwena uveze ukuthi ubengajoyina amakilabhu amakhulu eMorocco.
Uthi kodwa wakhetha i-Wydad ngenmuva kokuthi abalandeli bayo bekhombise uthando lwabo lwale kilabhu.
- ZITHOLE ZISHISA | Cofa la, ujoyine iWhatsApp Group yethu
“Sinabadlali abasha abangu-26, silwela ukuthola indawo yeChampions League,” kusho uMokwena.
“Siqale endaweni engeyinhle, siqale kude… Uyazi emidlalweni engu-10 edlule ukuthi lingakanani igebe obekumele silivale.
“Futhi sikwenzile lokho. Kungani laba badlali bengakwazi ukuthola ukwesekwa okufanele? Bengibabuka ngesikhathi sekhefu ukuthi bakhungathekile.”
UMokwena uthe abadlali bakhe bazibophezele njenganye kulo msebenzi abawenzayo, futhi abajabule nangomphumela.
“Ngibheka abadlali bami bese ngibuza, ‘kungani bengatholi ukwesekwa okubafanele?’ Ngiyaqonda ukuthi asikaze siwine lutho eminyakeni emibili.
“Ngiyaqonda ukuthi kukhona ukulambela iChampions League. Ngikholwe, akekho omunye olambele iChampions League ukwedlula mina.
“Bengisemidlalweni eyandulela owamanqamu iminyaka emibili ilandelana (neMamelodi Sundowns).
“Benginethuba lokujoyina amakilabhu adlala kwiChampions League kumanje.
- FUNDA NALA | Izibeke ethubeni elihle iNingizimu Afrika ngeChan
“Kodwa ngize ukuzojoyina i-Wydad ngoba ngesikhathi ngikwiSundowns sidlala neWydad, ngabona indlela abalandeli ababeyithanda ngayo ikilabhu yabo.
“Ngabona ukuthi bangibonisa kangakanani uthando. Yingakho ngingazange ngiye kwi-AS FAR, yingakho ngingazange ngiye kwiRaja Casablanca. Ngakhetha iWydad.
“Kodwa engikubonayo manje, ukuntuleka kokusekelwa kuyadumaza,” kwengeza le nsizwa eyake yaqeqesha iChippa United.
- SILANDELE KU-FACEBOOK | Cofa la, Lisenethini.co.za
