UMosimane akayena umqeqeshi odingwa yiPirates njengamanje
Kunamahlebezi aqinile okuthi uPitso Mosimane ungomunye wababhekwa abaphathi be-Orlando Pirates ukuqeqesha leli qembu.
Ngokwamava akhe ezingeni lomhlaba wonke nokuwolwa kwakhe izindebe, akumangazi ukuthi umataniswa nalo msebenzi.
I-CV kaMosimane iyazikhulumela. Useke waqeqesha ezwenikazi nase-Asia, wanqoba izicoco zeligi nezindebe zeCaf Champions League.
Noma iyiphi ikilabhu ingamfuna. Kodwa okwamanje, i-Orlando Pirates ingase ingabi sesimweni esifanele uPitso Mosimane.
Eminyakeni yakamuva, iPirates isishintshele ekusebenziseni abadlali abasebancane futhi abanikwa inkululeko yokuzibonakalisa enkundleni.
Abadlali abafana noRelebohile Mofokeng noMohau Nkota bayachuma ngenxa yenkululeko abanikwe yona.
UPatrick Maswanganyi esinye isibonelo esibalulekile sale ndlela entsha yePirates, ngokunjalo nabadlali abafana noKabelo Dlamini noKarim Kimvuidi.
Lesi sitayela sokudala sixhumanise kabusha iqembu nabalandeli balo. Ngaphambi kwalolu shintsho, iPirates ibingasakwazi ukugcwalisa i-Orlando Stadium.
Manje, abalandeli babuye ngamandla, bedonswa ibhola elikhangayo nenkululeko yokudlala eyayaziwa ngalo nakudala.
ISITAYELA SE-PIRATES SIYAPHAMBANA NESIKA-MOSIMANE
Yilapho uMosimane engase angqubuzane khona nale ndlela yamanje yePirates.
UMosimane ungumqeqeshi ofuna kulandelwe amacebo akhe ngendlela awahlele ngayo.
Akayena umqeqeshi ongabekezelela umjiko wokujabulisa abalandeli.
Lokho wakuveza obala ngesikhathi esekwiSundowns ngesikhathi ethethisa uFortune Makaringe ngokudlala umjiko bebhekene neqembu lakhe.
Wathi akunasidingo, futhi kukhomba “ukungahloniphi.” Wayegxeka umdlali wezimbangi.
Leso sigameko sikhuluma lukhulu. Isitayela se-Orlando Pirates samanje sakhelwe kulokhu uPItso Mosimane angakuthandi.
Ukusuka kulokho manje kungase kube sengozini yokuhlehlisa inqubekelaphambili iqembu eselibe nayo — kokubili emiphumeleni nasekubuyiseni kabusha abalandeli.
Ngabe uMosimane angakwazi ukuzivumelanisa nefilosofi entsha yePirates?
Noma ngabe abadlali bazodinga ukuzivumelanisa nezindlela zakhe eziqinile?
Futhi lolu shintsho luzothatha isikhathi esingakanani ukuthi lusebenze?
Yize uPitso Mosimane esengomunye wabaqeqeshi abahamba phambili e-Afrika, okwamanje kungenzeka kungabi yisikhathi esifanele kuyena ukuya kwiOrlando Pirates.
