UMcKenzie uphiphe iSafa ngehlazo lokungaholi kwabadlali
Kulandela imibiko yokuthi abadlali beBafana Bafana neBanyana Banyana bebengakakhokhelwa kulezi zinyanga ezimbalwa ezidlule, uMnyango wezeMidlalo usungenelele, waphipha iSafa.
UNgqongqoshe wezeMidlalo, uGayton McKenzie, ukhiphe isitatimende esithi uMnyango wakhe ususheshe wayikhokhela iSafa imali yesibonelelo sika-2025 ukuze kuxazululwe lesi simo.
“Kulandela imibiko yokuthi iSouth African Football Association (Safa) isiboshelwe imali yokukhokhela abadlali amaholo ngaphambi kwesizini yamaholidi, uMnyango wezeMidlalo, uthathe isinqumo sokusheshe iyifake imali engu-R5 million.
“UNgqongqoshe uGayton McKenzie ubhalele inhlangano ukuthi ikhishwe singakafiki isikhathi le malingokuqonda ukuthi izokhishwa esibonelweni esizokhokhwa ngonyaka wezimali ka-2025.
“Lokhu kuza nombandela wokuthi ubuholi beSafa kuzomele bunikeze izizathu zokuthi kungani izindaba zabo zezezimali zingezinhle,” kusho isitatimende.
“Kumele ibe nohlelo olusebenzayo lokuguqula isimo ukuze kugwenywe isimo esinjalo esikhathini esizayo.
“ISafa ivumelene nemibandela, yabonga uNgqongqoshe ngokungenelela.”
UMcKenzie yena uthe ukhathazwe wukuthi abadlali bazoya emaholidini okuphela konyaka bengaholile.
“Ngeke sivumele abadlali ukuthi bangene kule sizini yamaholidi ngaphandle kwemiholo, ikakhulukazi njengoba benze izwe laziqhenya.
“Iqembu labesilisa lisanda kungena kwi-Africa Cup of Nations, futhi sidinga ukuthi ligxile ekulungiseleleni lo mqhudelwano nokuqinisekisa ukuthi siyangena eNdebeni yoMhlaba ka-2026.
“IBanyana Banyana nayo iye yahola indlela, inqoba i-African Women’s Championship ngo-2022 futhi yangena eNdebeni yoMhlaba yeFifa ngonyaka odlule.”
