BUKA: UmkaGaston Sirino ezizwisa ngobumnandi bedabhi
Unkosikazi wesihlabani seKaizer Chiefs uGaston Sirino usevez euthando analo ngeNingizimu Afrika nabantu bakhona ngemuva kokuhambela idabhi yaseSoweto yakamuva.
Lesi sihlabani sase-Uruguay sesichithe iminyaka engaphezu kweyisikhombisa kuleli, kanti saqala kwiMamelodi Sundowns njengoba manje sesikwiChiefs.
Ube nempumelelo enkulu, enqoba izindebe ezingu-11, okuhlanganisa nezicoco zeligi eziyisikhombisa kuMasandawana.
Kule sizini, uGaston Sirino udlulele kwiKaizer Chiefs ngemuva kokuchithwa yiSundowns – usebheke inselelo entsha eNaturaena.
Ukudlalela Amakhosi kusho ukuba yingxenye yomdlalo webhola omkhulukazi eNingizimu Afrika — idabhi yaseSoweto.
Kule mpelasonto edlule, iChiefs ihlulwe ngo 2-1 yi-Orlando Pirates, kodwa kube wumcimbi obukhethekile emndenini wakwaSirino.
Unkosikazi kaGaston Sirino ubehambele lo mdlalo futhi ngokuhamba kwesikhathi washicilela ividiyo yokwenzeke ngalolu suku eFNB Stadium.
Kule vidiyo ayishicilele kwi-Instagram, ukhombise izigcawu zezitendi ezigcwele phama nomndeni wakhe uzijabulisa kule ndumezulu yomdlalo.
Uyiphelezele ngombhalo othi: “Siyayithanda iNingizimu Afrika, abantu bakhona, nendlela yabo enhle abajabulela ngayo ibhola.”
Amazwi akhe awuphawu oluqinile lokuthi umndeni wakwaSirino uzizwa usekhaya eNingizimu Afrika.
Kubadlali abaningi bangaphandle, ukuzinza ezweni elisha akulula futhi abanye bajaha ukubuyela emuva.
Kodwa abakwaSirino bona babonakala sebeyamukele futhi beyithokozela ngokugcwele impilo yaseNingizimu Afrika — ngaphakathi nangaphandle kwenkundla.
Njengoba uGaston Sirino manje eseyingxenye yeKaizer Chiefs, ukwesekwa ngumndeni wakhe kungaba wukhiye njengoba ebheke ukuzakhela igama kulezi zinkunzi.
Kulindeleke ukuthi abambe iqhaza elikhulu ekusizeni Amakhosi ukuthi anqobe indebe yawo yokuqala eminyakeni eyisishiyagalolunye ngoMgqibelo.
IChiefs izophinde ihlangane nePirates, kulokhu kowamanqamu weNedbank Cup eMoses Mabhida Stadium eThekwini. Buka ividiyo ngezansi:
https://www.instagram.com/reel/DJUR_GDI0ur/?utm_source=ig_web_button_share_sheet
