UMbatha uveza okumnike isibindi kwiBafana
- Sibongiseni GUMBI
Umdlali wasesiswini we-Orlando Pirates, uThalente Mbatha, usekhulume yokuvelela emdlalweni wakhe wokuqala kwiBafana Bafana – uthi ubethuke efa.
Lesi sihlabani esineminyaka engu-24 singomunye wabadlali beBhakabhaka abaqokwe nguHugo Broos kwelidlala eyokuhlungela i-Afcon.
UMbatha ungene esuka ebhentshini ngesikhathi iBafana idlala ngokulingana ngo 2-2 ne-Uganda e-Orlando Stadium ngoLwesihlanu.
Ungene kwabonakala akuzele njengoba kunguye ophule iBafana ebhodweni ebibiliswa ngalo yi-Uganda ebihamba phambili ngo 2-1.
Ushaye igoli elibalulekile elivimbe ihlazo lokushayelwa ekhaya kweBafana, umdlalo waphela ngo 2-2.
“Ngiqale ngashaywa wuvalo,” kusho uMbatha ku-website yePirates.
“Kodwa ngazitshela ukuthi kumele ngizame ngayo yonke indlela ukudlala ngendlela yami engiyijwayele.”
Uthe ukhumbule amazwi kaBroos, obatshelile ukuthi bakwiBafana ngoba kubafanele, akekho owenzelwe umusa.
“Umqeqeshi ubeshilo ukuthi sikuleli qembu ngoba kusifanele ngendlela esidlale ngayo emakilabhini ethu, kufanele sisebenze kanzima njengoba sesikhona.
“Ngifuna ukubonga uNkulunkulu ngoba ukube bekungengenxa yakhe bengingeke ngilithole leli thuba.
“Futhi ngiyaziqhenya futhi ngijabule ngengikwenzile, futhi ngethemba ukuthi maningi amagoli ezayo.”
UMbatha ungomunye wabadlali abamqoka kwi-Orlando Pirates kaJose Riveiro kulezi zinyanga eziyisishiyagalombili ezedlule.
Ujoyine lezi zinkunzi zaseSoweto esuka kwiSuperSport United ngenkontileka yokubolekiswa ngoJanuwari nonyaka – ngaphambi kokuthi asayine ngookugcwele ngoJulayi.
Ukudlala okuncomekayo kwalo mdlali owake wadlalela iHighlands Park kudonse amehlo kaBroos waze wambiza eqenjini lesizwe okokuqala.
