UMakaab usola uMahoota ngohubhu lukabhejane
Isikhulu seProSport International, uMike Makaab sithi uhubhuza aluhlaza cwe amanga uKatlego “Mahoota” Mashego ngakusho kwenye yamaPodcast muva nje.
UMahoota, owayengumgadli we-Orlando Pirates ulandise indlela ashiya ngayo kulezi zinkunzi zaseSoweto, waya kwiGolden Arrows.
Uzwakala echaza indaba yakhe kwenye yamavidiyo ashisa izikhotha ezinkundleni zokuxhumana kuleli sonto.
Uthe lokhu kwenzeka ngaphandle kolwazi lwakhe njengoba kwashintshiswana ngaye ukuze iPirates ithole uSiyabonga Sangweni kwiGolden Arrows.
Echaza, uthe wayenenkinga ethile kwiPirates wabe eseya kusihlalo wayo u-Irvin Khoza ukuyokhuluma ngayo. Ngemuva kokuzwa udaba lwakhe, uKhoza wathi akamlandele.
“Wathi angishiye imoto yami, sangena kweyakhe sahamba – la endleleni sasizixoxela nje ngezinye izindaba ezehlukene,” kusho yena.
“Saze sayofika kuleli hhotela elisesikhumulweni sezindiza (i-OR Tambo) sangena kwelinye igumbi nje okubanjelwa kulo imihlangano.
“Kulo safica kukhona uSiyabonga Sangweni nemenenja yakhe uMike Makaab, nosihlalo weGolden Arrows (uMato Madlala).
“Ngabe sengichazelwa ukuthi iPirates ifuna uSangweni, kanti i-Arrows yona ifuna mina. Kwathiwa okunye wukuthi uSangweni ufuna ijezi lami uNamba 21.”
Abantu bebevele beshaya amakhala ngale ndaba yakhe, besola ukuthi uKhoza ngeke asebenze ngaleyo ndlela.
Omunye wabo ube esebuza uMakaab ngalokhu. UMakaab wayeyimenenja kaSangweni futhi negama lakhe libaliwe kubantu ababekhona kwenziwa lesi sivumelwano.
“Mbhedo muni manje lo?,” kubuza uMakaab ngemuva kokubona le vidiyo la uMahoota echaza khona le ndaba yakhe.
FUNDA NALA | Nangu uMkhize owinele ijezi koweLisenethini
“Angikaze ngibe segunjini elilodwa noSangweni nabanikazi bamakilabhu womabili. Mina ngangingazi lutho ngalesi sivumelwano kuze kube ngaziswa ukuthi sebevumelene ngokudayiselana.
“Mina ngangena ngoba sengisiza uSiya ngenkontileka yakhe siqu nePirates. Angimazi kwalo mdlali okhuluma la ukuthi ungubani.”
