UKhanye ukhala ngama‘robhothi’ ePirates, uncoma isu leChiefs
UJunior Khanye useveze into ebe umehluko phakathi kwe-Orlando Pirates neKaizer Chiefs kwidabhi yangempelasonto edlule.
Ekhuluma kwi-iDiski TV, uKhanye uthe iChiefs ingene kulo mdlalo inenhloso ecacile — ukuphazamisa isigqi sePirates.
“IKaizer Chiefs ibifuna ukuphazamisa i-Orlando Pirates, futhi ikwenze kahle lokho,” kusho le nkakha.
Ube esencoma isu laMakhosi ashintshe isitaela sawo sokuhlasela, asebenzela ukuphazamisa isigqi eBhakabhaka.
“Babonile ukuthi iPirates iyingozi maphakathi nenkundla. Ukudlala ngabadlali abamakayo abathathu esiswini kwenze umdlalo wasinda kuRele,” kuchaza uKhanye, ebhekise kuRelebohile Mofokeng.
Utuse Amakhosi ngokululandela kahle uhlelo lwawo lokudlala, ikakhulukazi ebhekene nePirates eyibhakuzisayo inethi muva nje.
Kodwa ngesikhathi iKaizer Chiefs eyincoma, ube eseveza ukungeneliseki ngezihlabani ze-Orlando Pirates.
UKhanye ukhale ngoMofokeng no-Oswin Appollis ngokuhluleka ukuziveza emdlalweni omkhulu.
“Lona umdlalo wabadlali abakhulu… abanye abadlali bePirates babengamarobhothi nje. Ngiphoxeke kakhulu,” kuqhuba yena.
“Ngihlale ngisho ukuthi uRele udonsa kanzima emidlalweni efana nalena, ikakhulukazi yedabhi.
“U-Appollis naye ubengekho kangako emdlalweni kanti uMoremi, ngeshwa usheshe walimala, kodwa ngisho nakulemizuzu engu-15 noma 20 ayidlalile, ubengekho emdlalweni.”
Umphumela nokho ugcine i-Orlando Pirates iqhwakele kwilogi yeBetway Premiership ngamaphuzu angu-59, iKaizer Chiefs ihlezi endaweni yesithathu ngawu-47.
