Ukhala ngesisindo esithweswe uRele Mofokeng kwiBucs
Ukuthembela kakhulu kwe-Orlando Pirates kuRelebohile Mofokeng oneminyaka engu-20 kuyinkemba esika nhlangothi zombili.
Umhlaziyi we-iDiski TV uJunior Khanye ukholwa ukuthi lokhu kuncika kakhulu kuye kubeka ingcindezi engafanele kulesi sihlabani esisesincane.
URele Mofokeng uphinde wehluleka ukuthwala leli qembu ngesikhathi lihlulwa yiMarumo Gallants muva nje.
Lokhu kuhlulwa kunwebe igebe phakathi kwayo neMamelodi Sundowns lafinyelela kumaphuzu angu-18.
UKhanye ubona ukuthi ubuhlakani bukaRele Mofokeng buvamise ukuthwala iqembu.
Lokhu kube sekuholela ekutheni izimbangi zigxile ekumakeni yena, bese kuhlala obala ukuthi akekho omunye omesekayo kwiPirates.
“Uyabona imidlalo inqotshwa abadlali abathile, hhayi iqembu lilonke,” kuvuma uKhanye.
Uncome uMofokeng kodwa waxwayisa ngomthwalo ongafanele abekwe wona.
“Kuyo yonke imidlalo, usehlezi amakwe eduze kanti usemncane, usakhula.”
Ngaphezu kwalezi zinselelo, izibalo zesizini ka-2024/25 zikaMofokeng ziyamangalisa.
KwiBetway Premiership, usedlale imidlalo engu-15, washaya amagoli amabili wakhela ozakwabo amahlanu, waqongelela imizuzu engu-1,343 esenkundleni.
Ukusebenza kwakhe kwiCaf Champions League kuyaphawuleka, ngokubonakala emidlalweni eyisishiyagalolunye.
Ushaye amagoli amane, waphide wakha amanye amabili emizuzwini engu-782 ayidlalile kulo mqhudelwano.
KwiMTN8 khona ushaye amagoli amabili, wakha amabili emidlalweni emine, okuhlanganisa imizuzu engu-258.
Sekukonke, uRele Mofokeng usudlale emidlalweni engu-31 kuyo yonke imiqhudelwano kule sizini kwiPirates.
Ushaye amagoli ayisishiyagalombili futhi wakhela ozakwabo angu-11, emizuwzini engu-2 630 aseyidlalile.
Ukusebenzisana kwakhe noTito Maswanganyi kube yingqophamlando, kodwa uKhanye unombuzo ngokuthi ngabe abanye ozakwabo bazosukumela phezulu ukuze babelane ngomthwalo.
Ukukhathazeka kusekhona: Ngabe ithalente likaMofokeng lilodwa lingayisekela iPirates, noma iqembu lizohlangana ukuze lisekele lesi sihlabani salo esincane?
