U-Ouaddou ucacisa eyokukhipha uTito koweDowns
Umqeqeshi we-Orlando Pirates, u-Abdeslam Ouaddou ukhombise isibindi esingandile ngesikhathi emonyula omunye wabadlali abangaconsi phansi kubalandeli ngesiwombe sokuqala.
U-Ouaddou umangaze abaningi ekhipha uPatrick “Tito” Maswanganyi ngomzuzu ka-39, wabe esefaka uBandile Shandu endaweni yakhe.
Lolu shintsho ubelwenzela ukuthi kuzokhululeka uKamogelo Sebelebele ukuthi aye phambili ayohlasela.
USebelebele ubeqale edlala emuva kwesokudla. Kodwa ngokuthi izinto bezingahlangani uma iya phambili, u-Ouaddou wabe esenza loku shintsho.
Lolu shintsho lusebenzile njengoba uSebelebele kunguye oshaye igoli lokulinganisa lePirates – okuyigoli lakhe lesithathu emidlalweni emithathu.
Ekhuluma ngemuva komdlalo, u-Ouaddou ucacise ngalesi sinqumo sakhe, ethi ukumkhipha kwakhe akusho ukuthi akasamethembi noma akakholelwa kuye.
“Ngibe ngumdlali iminyaka engu-17 ngaphambi kokuba ngumqeqeshi,” usho kanje ephendula le ndaba kamaswanganyi.
“Kuyenzeka kwesinye isikhathi ukuthi ungabi semdlalweni – lokho kodwa akusho ukuthi usungumdlali obhedayo.
“Ungumdlali omuhle kakhulu, ubelokhu engumdlali obalulekile eqenjini kule minyaka edlule.
“Namuhla bekungelona usuku lwakhe. Ngiseqiniseko usazosisiza emidlalweni ezayo,” kusho u-Ouaddou.
FUNDA NALA | IPirates iphinde yayikeqa iSundowns kwiMTN8
UMaswanganyi akayiqalanga kahle le sizini njengoba ebukeka ehlelwe wumgqigqo wakhe nje.
Bekungewona umdlalo wokuqala engenzi kahle kule sizini futhi nabalandeli sebeke bayikhuluma eyokuthi mhlawumbe kumele ake aphunyuzwe.
