UKaizer Junior uphawula ngekusasa likaNabi kwiChiefs
Umqondisi weKaizer Chiefs, uKaizer Motaung Junior, usephendule ngombiko wabezindaba osabalele oveza ukuthi bazohlukana nomqeqeshi uNasreddine Nabi.
Ngemuva kwamahora ambalwa uNasreddine Nabi ehole iKaizer Chiefs inqoba indebe yayo yokuqala eminyakeni engu-10, kuvele izindaba zokuthi ngeke agcinwe ngesizini ezayo.
IChiefs ishaye i-Orlando Pirates ngo 2-1 eThekwini ngoMgqibelo ukunqoba iNedbank Cup, okulandelwe yimigubho emikhulu ezweni lonke.
Kodwa ngeSonto kuvukwe ngezindaba zokuthi ukungenzi kahle kweChiefs kwiBetway Premiership sekwenze abaphathi beqembu balingabaza ikhono likaNabi.
Kubikwa ukuthi ubebekelwe ukuthi aqede ephakathi kwamaqembu amathathu aphezulu kwilogi, aphinde akhe iqembu eliqinile nelidlala ibhola elicacile.
Akukho kulokhu okwenzekile ngesizini yokuqala kaNasreddine Nabi kwiKaizer Chiefs okwenze kwaphuma isinqumo sokuthi akhululwe yena nethimba lakhe elimsizayo.
IChiefs njengamanje isendaweni yesishiyagalolunye kwilogi, kanti isengcupheni sokuqeda ngaphandle kweTop 8 okwesibili kulandelana.
Ekhuluma noXoli Zondo kwi-5FM ngoMsombuluko ekuseni, uKaizer Junior akakwazanga ukuphuma nempendulo eqondile ngekusasa likaNabi.
“Umqeqeshi usenenye isizini nathi ngemuva kwale,” kusho uKaizer Junior – uNabi usayine eyeminyaka emibili.
“Kodwa ngesikhathi esifanayo, njengoba senza njalo ngemuva kwesizini ngayinye, sihlala phansi sibuyekeze.
“Siyazi ukuthi imiphumela yeligi ayizange ihambe kahle noma ngendlela ebesiyifisa.”
Uthe okwamanje nokho basagxile ekutheni bangayisebenzisa kanjani impumelelo yeNedbank Cup ukuze bakhele ikusasa.
“Sikwazile ukuzuza irekhodi eliyingqophamlando ngeNedbank Cup, ngakho konke okunye kuzongena endleleni esihlela ngayo indlela eya phambili.
“Okwamanje, sifuna nje ukujabulela lesi sikhathi futhi sisebenzise lesi sikhathi ngendlela ukwakhela ikusasa nendlela eya phambili.
“Kufanele sisebenzise lesi sikhathi ukukhuthaza ithimba labaqeqeshi, abadlali nabasebenzi ngomsebenzi olandelayo – ukuhlelela ikusasa.”
