UJose Riveiro uthathe nephini lakhe eshiya kwiPirates
Obengumqeqeshi we-Orlando Pirates, uJose Riveiro, usekuqinisekisile ukuthi obeyiphini lakhe kuleli qembu, uCarlos Nodar Paz naye useshiyile kwiBucs.
Laba bobabili bahambe ndawonye njengoba beyoqala inselelo entsha kwi-Al Ahly e-Egypt.
UJose Riveiro ubambe indiza esuke eNingizimu Afrika ebheke e-Egypt ngoLwesithathu ebusuku.
Kulindeleke ukuthi ethulwe yiziqhwaga zase-Egypt i-Al Ahly njengomqeqeshi wazo omusha ngoLwesine ekuseni uma efika.
Lo mqeqeshi waseSpain ubengeyedwa endizeni. UPaz, omjoyine ekuqaleni kwale sizini kwiPirates, umlandele eqenjini elisha.
“Ngihamba namuhla noCarlos Nodar,” usho kanje uRiveiro kwiMarawa Sports Worldwide ngoLwesithathu.
“Wangijoyina ngiseSpain, waphinda futhi nalapha eGoli – manje sesiya naye la ngiya khona.”
URiveiro ubonge usihlalo nabaphathi bePirates ngokunavumela ukuthi basheshe bahambe.
Uphakamise ukuthi kungase kube nabantu abaningi bePirates abazomlandela baye kwi-Al Ahly.
“IPirates isenemidlalo ebalulekile. Ngiyakuhlonipha ngokuphelele lokho. Noma bengingathanda ukuhamba nawo wonke umuntu, lokho bekungenakwenzeka manje.”
UJose Riveiro uhlale iminyaka emithathu kulezi zinkunzi zaseSoweto. Uwine izindebe ezinhlanu futhi wakha iqembu eliqinile labaqeqeshi abesebenzisana nalo.
Kodwa manje, uselungele isinyathelo esilandelayo ohambweni lwakhe lokuqeqesha. Uzoqala umsebenzi wakhe omusha ne-Al Ahly maduze nje.
Leli qembu lilungiselela iFifa Club World Cup kanti kubikwa ukuthi licele ukuthi alijoyine kusenesikhathi, wabe esecela iPirates ukuthi asheshe adedelwe.
“Kuyithuba elihle limi leli,” kusho uRiveiro. “Ngikholwa ukuthi yilokho okwenze usihlalo avume ukungidedela.
“Angizange ngibuthi quthu ubuthongo izolo (ngoLwesibili) ebusuku, kodwa ngizobe ngikulungele ukunikeza konke okusemandleni ami.”
URiveiro uthembise ukusebenza ngokwethembeka nangokuzimisela okufanyo naseqenjini lakhe elisha.
“Ngiyazi ukuthi abalandeli bePirates bazobe bekubuka engikwenzayo lapho ngiya khona. Ngiyakwamukela ngokuphelele lokho,” kuqhuba yena.
“Ngingase ngingabi nawo amandla aphelele namuhla, kodwa kusasa ngizobe sengikulungele ukuqala kabusha.”
Uveze ukuthi angase ethulwe ngoLwesine eqenjini lakhe elisha.
Lo mnyakazo uphawula isahluko esisha sabo bobabili uRiveiro noPaz.
Khonamanjalo, iPirates izobheka ukuqeda ngegiya eliphezulu kwiligi ngaphandle komqeqeshi nephini layo.
UMandla Ncikazi, obeyiphini lesibili likaJose Riveiro, unikezwe umsebenzi wokuqedela isizini kwiPirates.
