Kusekukhulu okuzayo – Tshepang Moremi woSuthu
UTshepang Moremi uthi kuningi okusazovela kuyena futhi lokhu kusho izinto ezinhle kuMaZulu FC.
Lo mdlali oneminyaka engu-24 ubudala ubekhuluma ngemuva kokusiza ekwakheni amagoli amabili ngesikhathi AmaZulu eqoqa amaphuzu.
USuthu lunyukele endaweni yesihlanu kwiBetway Premiership ngemuva kokushaya iCape Town City ngo 2-0 ngeSonto ntambama.
U-Elmo Kambindu ubeke AmaZulu phambili ngomzuzu ka-22, ehlomula ebholeni elibekwe kahle phambi kwakhe nguTshepang Moremi.
UTshepang Maremi uphinde waba ngumhlinzeki ngomzuzu ka-62 ebekela uNkosikhona Radebe ukuthi ashaye igoli lakhe lokuqala oSuthwini.
“Ngibonga uMdali nabasondelene nami, nomndeni ngokungeseka,” kusho uTshepang Moremi.
“Ngisebenza ngokuzikhandla futhi kusekuningi okuzayo. Ngeke ngilehlise izinga ngoba ngiyabona kuhle phambili.
“Nginomdlandla omkhulu, nami kwesinye isikhathi angazi uvelaphi. Yinto ezenzekela ngokwemvelo.”
Uncome nomqeqeshi u-Arthur Zwane, wathi nguye omcebisayo ngendlela yokudlala emenza abe ngcono kakhulu.
“Kulokho ngingathi umqeqeshi uZwane ohlezi engitshela ukuthi kumele ngihlezi ngiqaphile ngoba ngeke ngazi yini ezokwenzeka.
“Uthi kumele ngihlezi ngiqalaza. Kumele ngimbonge ngoba uhlezi engigqugquzela, ethi angizikhandle ngoba kukhona akubona kimi.”
Bekungokwesibili emidlalweni yePremiership uSuthu lunqoba lungazange lungenelwe goli futhi lubukeka lusesimweni esihle.
“Besinecebo namuhla, besingadlali nje. Besikwazi okumele sikwenze. Kodwa sesobona ukuphela kwesizini ukuthi siphelelaphi,” kuphetha uMoremi.
Umdlalo olandelayo woSuthu uzoba ngoLwesithathu la luzobhekana khona neSuperSport United ekuhambeni.
UMoremi uzobe ebheke ukuqhubeka nale fomu yakhe enhle kuze kuphele isizini ngoba ingase imfake naseqenjini lesizwe.
