UHugo Broos uveza okuzokwenza angamdlalisi uMbokazi
Umqeqeshi weBafana Bafana uHugo Broos useveze ukuthi kunabadlali ababili angeke abadlalise emdlalweni wangoLwesihlanu.
IBafana izozwana amandla nePanama eMoses Mabhida Stadium emdlalweni othathwa ngowokulungiselela iNdebe yoMhlaba.
Kodwa manje uHugo Broos useveze ukuthi kunesimo esimphoqa ukuthi ababili babadlali abaqokile angabasebenzisi.
Lo mqeqeshi oneminyaka engu-74 ubudala odabuka eBelgium uthe uBongokuhle Hlongwane noMbekezeli Mbokazi ngeke badlali ngoLwesihlanu.
“Into eyodwa engongayisho ngeqembu wukuthi uHlongwane noMbokazi ngeke badlale,” kusho uBroos eThekwini ngoLwesine.
“Lokhu akukho ngamaqhunga okudlala. Futhi akungoba begula noma belimele.
“Inkinga wuhambo olude abaluthathile besuka e-America ukuze bafike lapha, ngakho bakhathele.”
Bobabili laba badlala kwi-US Major League Soccer futhi bafike kuleli ngoLwesibili.
Yize isizathu sikaHugo Broos sizwakala, kodwa okubi wukuthi bobabili laba badlali badabuka KwaZulu-Natal.
Leli bekuyithuba lokuthi badlali phambi kwemindeni nabangani babo ngemuva kwesikhathi eside babagcina.
Nokho kubukeka bona bazoze badlale ngoLwesibili uma iBafana seyiphinda nayo iPanama eKapa.
Lo mqeqeshi uphinde waveza ukuthi ujabule ngomuzwa awubone kubadlali kule khempu.
Lokhu kulandela ukuthi ebe nezikhalo ngendlela isimo esasiyiyo kweye-Africa Cup of Nations ngoDisemba.
“Ngijabule kakhulu ngengikubona uma sizilolonga,” kuqhuba uHugo Broos.
“Ngibona sengathi abadlali bazimisele impela ukuthola umphumela omuhle.
“Sonke siyazi ukuthi yimbangi enzima le, kodwa ukudlala nayo kuhle ukusilungiselela umdlalo wethu neMexico ezinyangeni ezintathu ezizayo.”
Yize lona kuwumdlalo wokuzwana amandla, uHugo Broos ufisa bawunqobe ukuze banyuse ukuzethemba.
IPanama ikleliswe endaweni ka-33 emhlabeni jikelele futhi iyiqembu elihle kakhulu.
“Umphumela ubalulekile – uhlezi ubalulekile. Ayikho enye indlela,” kwengeza uBroos.
“Kodwa ngokwami into ebaluleke kakhulu njengamanje yindlela iqembu elidlala ngayo, hhayi umphumela.
“Uma singadlala kahle bese sinqoba, ngicabanga ukuthi lokho kuzokhuphula ukuzethemba eqenjini.
“Leyo yinto esiyidingayo ngemuva kokuphoxeka kwi-Afcon. Kodwa nginethemba ngoba ngiyabona siwulungele lo mdlalo.”
Lo mdlalo uzoqala ngo-7 ebusuku kanti uzokhonjiswa bukhoma kuS3 ebiyaziwa ngeSABC 3 phambilini.
