Uhlola elinye iqembu umqeqeshi wePirates kowePafos

Libukeka kuyilona qembu okungase kue yilo adla ngalo umqeqeshi we-Orlando Piates leli aqala ngalo umdlalo wobungani ngeSonto ekuseni.

I-Orlando Pirates izozwana amandla nePafos FC yaseCyprus eMarbella Sports Centre emdlalweni wayo wesibili kulolu hambo lwayo lokulungiselela isizini eSpain.

Ishaywe ngo 2-0 yiBolton Wanderers emdlalweni wokuqala phakathi nesonto yize beyidlale kahle, ikakhulukazi esiwombeni sokuqala.

Kulo mdlalo wesibili umqeqeshi – u-Abdeslam Ouaddou – uhlanganise abadlali abebedlale isiwombe sokuqala nesesibili ngokwehlukana ngoLwesine nabebengekho nhlobo.

Iqembu alibophele kwiPafos libukeka libhalanse kahle kanti phambili liholwa umgadli osemncane uYanela Mbuthuma osuka kwiRichards Bay FC. 

• FUNDA NALA | Kubhimbile kwiChiefs – kodwa kunezimpawu ezithembisayo

Kusesiswini la kuzothatha khona amehlo ukubona ukuthi uSipho Mbule uhlangana kanjani noThalente Mbatha maphakathi nenkundla.

Ezimpikweni ubeke isethenjwa esisesincane uRelebohile Mofokeng, kolunye wabeka u-Oswin Appolis obekwiPolokwane City bese ngemuva komgadli kube uKabelo Dlamini. 

Emuva akazange ashintshe njengoba eqale ngezethenjwa abaqede ngazo isizini ephelile futhi ebezidlala ngokuhlangana kahle.

• COFA LAPHA: | Usijoyine kuFacebook 

Ibophele kanje iPirates kulo mdlalo: Chaine – Hotto, Van Rooyen, Sibisi, Mbokazi – Mofokeng, Appolis, Mbule, Mbatha – Dlamini – Mbuthuma

• WINA! | Gcwalisa imininingwane yakho ngezansi uzibeke ethubeni lokuwina ijezi elisha leqembu lakho