UCross akafuni ukusheshe anconywe kwiChiefs
- Sibongiseni GUMBI
UBradley Cross usheshe waziveza njengomdlali ozoba mqoka eqenjini likaNasreddine Nabi kwiKaizer Chiefs.
Lo mdlali oneminyaka engu-23 uthole umklomelo weMan-of-the-Match ngesikhathi iqembu lakhe livula iBetway Premiership.
Udlale kahle ngesikhathi Amakhosi eqoqa amaphuzu amathathu ngokushaya iMarumo Gallants ngempelasonto edlule.
Lo mdlalo ububanjelwe eToyota Stadium, eBloemfontein ngoMgqibelo, kanti le nkundla beyigcwele phama.
UCross udlale ngendlela ehlabe umxhwele izinhloli zeChiefs ngesikhathi ekwiGolden Arrows ngesizini edlule.
Ukufika kwakhe eNaturena kubonakala kwenza umehluko obonakalayo odongenii lwasemuva.
Ucishe wasivula ngegoli isahluko sakhe kwiChiefs ngesikhathi engqofa ngobuchule ibhola esiwombeni sokuqala.
Nokho unozinti weGallants, uWashington Arubi, ukwazile ukumvimba ekutheni engeze negoli ekudlaleni kwakhe.
Umqeqeshi weChiefs uNasreddine Nabi uncome “umqondo wokunqoba” awubone eqenjini lakhe.
Nakuba engazange ambalule ngegama uCross, ukusebenza kwalo mdlali wasemuva kube yisibonelo salokho uNabi abekhuluma ngakho.
Ngemva komdlalo, uCross ukhulume ngebumqoka bokuzithoba nokuqhubeka nokusebenza ngokuzikhandla.
Ugcizelele ukusebenza kweqembu nokubambisana athi yikho okusize ekunqobeni kwabo.
“Ngijabule kakhulu ngokuthi sithole amaphuzu amathathu,” kusho uCross kwiwebhusayithi yeChiefs.
“Sonke besisebenza ngokubambisana futhi sisizana omunye nomunye. Umqeqeshi usifundise lokho.
“Namuhla ngijabule ngendlela esibambisane ngayo ukuze silwe futhi sinqobe,” kwengeza yena.
Ukusebenza kukaCross ekuqaleni kukhombisa ukuthi angadlala indima ebalulekile emkhankasweni weqembu kule sizini.
Abalandeli beChiefs bazobheka ukuthi aqhubeke nale fomu yakhe nasemdlalweni olandelayo.
OLUNYE UDABA:Â Ufunwa yiSekhukhune onyiwa yijezi kwiDowns
Amakhosi azovakashela AmaZulu FC emdlalweni wawo olandelayo weBetway Premiership, ohlelelwe uSepthemba 25, eThekwini.
