Ugxaliwe kwelaphesheya oke wacija iPirates
Owake waba ngumqeqeshi we-Orlando Pirates usehlukene ngokusemthethweni neqembu abelicija phesheya kwezilwandle.
UBradley Carnell uhlukane neqembu le-US Major League Soccer, iPhiladelphia Union ngemuva kwemiphumela engemihle.
Iqembu likuqinisekisile ngoLwesithathu ukuthi isinqumo sibe ngesokuvumelana kwezinlangothi zombili.
Lo mqeqeshi waseNingizimu Afrika oneminyaka engu-49 ubudala ufike kwiPhiladelphia enedumela elikhulu ngemuva kokuthweswa umqhele wokuba nguMqeqeshi woNyaka kwiMSL ngesizini edlule.
Ngaphansi kobuholi bakhe, iPhiledelphia ibe nomkhankaso obukeka uza kahle, yanqoba iMLS Supporters’ Shield.
Nokho izinto zishintshe ngendlela emangalisayo kule sizini.
Iqembu lilahlekelwe umgqigqo ngendlela ethusayo, futhi liqoqe amaphuzu ayisikhombisa kuphela emidlalweni yayo yokuqala engu-15.
Lokhu kufake ingcindezi kuCarnell owayedlala kwiKaizer Chiefs neBafana Bafana esengumdlali.
Umnikazi oyinhloko wePhiladelphia Union uJay Sugarman uhloniphe uCarnell ngeqhaza lakhe ekilabhini.
“Egameni lenhlangano yePhiladelphia Union, ngifuna ukubonga uBradley ngokuzinikela nokuzibophezela kwakhe eqenjini ngesikhathi sakhe lapha,” kusho uSugarman.
UCarnell waqala kwiFree State Stars ukuqeqesha. Wabe esedlulela kwi-Orlando Pirates eyiphini likaMuhsin Ertugral.
Ekushiyeni kuka-Ertugral kwi-Orlando Pirates, uCarnell wabamba isikhashana ngaphambi kokuthi aye phesheya la asehlale khona iminyaka eminingi.
