Ufunwa uthuli kwelakubo uCedric Kaze weKaizer Chiefs
Kubikwa ukuthi iKaizer Chiefs isithole isicelo esikhethekile esivela kwiBurund Football Association ngomqeqeshi wayo uCedric Kaze.
Isicelo simayelana nokuthi lo mqeqeshi ajoyine iqembu lesizwe laseBurundi ngekhefu elizayo lamazwe ngamazwe.
UCedric Kaze ucija iGlamour Boys ngokubambisana noKhalil Ben Youssef kusukela kwahamba uNasreddine Nabi ngonyaka odlule.
Manje, le nhlangano eyengamele ibhola yangakubo eBurundi inesifiso sokubolekwa yena izinsukwana ekupheleni kwale nyanga.
UKaze uke wasebenza cishe kuwo wonke amazinga phakathi emaqenjini esizwe eBurundi kusukela kwabaneminyaka engaphansi kuka-17 kuya eqenjini elikhulu.
Manje le nhlangani ikhola ukuthi unezimfanelo eziphelele ukusiza iqembu lesizwe liqhubekele phambili.
Futhi kungaleso sizathu ukuthi bafisa ukuqoka lo mqeqeshi weKaizer Chiefs njengomphathi wezokuqeqesha.
Ngokubika kweFARPost, uKaze ufunelwa ukusiza iBurundi emidlalweni yayo ezayo yokuhlungela i-Afcon.
Izobhekana neChad emidlalweni emibili womzuliswano wokuqala wokuhlunga ngasekupheleni kwale nyanga.
“IBurundi Football Association kubikwa ukuthi iye kwiKaizer Chiefs icela ukubolekwa uCedric Kaze okwesikhashana.
“Ifuna azoyisiza emidlalweni emibili yokuhlungena i-Afcon ezayo,” kusho lo mbiko.
Uma iKaizer Chiefs ivuma, uCedric Kaze uzobe esesiza iBurundi ukuthi izilungiselele le midlalo futhi ahlale ebhentshini nomqeqeshi uPatrick Sangwa.
FUNDA NALA | UVilakazi usola uBroos ngokukhetha iphela emasini
IChiefs izobe ingadlalai ngaleso sikhathi okuyingakho iBurundi iveze lesi sifiso sokusebenzisa uKaze.
Kusazobonakala ukuthi iGlamour Boys izosamukela yini lesi sicelo. Kodwa ayikaze ibe nenkinga nabanye phambilini.
