Ubukela kuKaizer Motaung oweBucs owakha inkundla

• Sibongiseni GUMBI

UDeon Hotto, isihlabani se-Orlando Pirates, useveze ukuthi uluthole kuphi ugqozi lokwakha inkundla yezemidlalo ebiza izigidi zamarandi edolobheni lakubo iSwakopmund, eNamibia. 

UHotto udalule ukuthi ugqozi lwalo msebenzi awuqalile waluthola ngemuva kokufunda ngempilo kasihlalo weKaizer Chiefs, uKaizer Motaung.

Lo mdlali, ongomunye wabenza kahle kwiPirates, unqume ukubuyisela emphakathini akhulela kuwo ngento ezosiza umphakathi futhi engasoze yalibaleka. 

Ngesikhati kuvaliwe ebholeni kuleli, uHotto ubuyele ekhaya la ethule khona ngokusemthethweni iDeon Hotto Foundation. 

Ube esefaka u-R2 million wokwakha inkundla yezemidlalo eSwakopmund, kanti uthi ugqozi lwalokhu uluthole kwindlela uMotaung asungula ngayo iKaizer Chiefs.

UMotaung usungule iChiefs esanda kubuya e-United States, la ayedlala khona ngo-1970.

“Engikwenzayo ekhaya empeleni yinto engayithola kuKaizer Motaung,” kusho uHotto etshela iSABC Sport. 

“Ngafunda ngohambo lwempilo yakhe; ubedlala e-States, kwathi uma ebuya waqala iqembu lakhe elincane, iKaizer Eleven. 

“Ngakho-ke, kimina, kumayelana nokuzama ukubuyisela emphakathini wakithi. 

“Indaba yakhe yangikhuthaza, futhi yilokho nami engifuna ukukwenza.”

OLUNYE UDABA: IChiefs isisitholile isitobha ebisihubha, sekubhekwe umgadli

Isinyathelo sikaHotto sihlose ukwakha ifa laphakade edolobheni lakubo, njengoba kwenza uMotaung ebholeni laseNingizimu Afrika.