UDa Cruz ushintshe umshovo kwiChiefs efuna ukubuyisa izinduku
UFernando Da Cruz wenze izinguquko ezinkulu eqenjini le-Kaizer Chiefs elizoqala umdlalo neRed Arrows yaseZambia.
La maqembu azogadulisana emdlalweni weCaf Confederation Cup ngoLwesihlanu ngo-6 ntambama eMoses Mabhida Stadium, eThekwini.
IChiefs ingena kulo mdlalo ilandela ngemuva ngegoli elilodwa ngemuva kokuhlulwa ngo 1-0 emlenzeni wokuqala.
Isidingo sokunqoba sicacile njengoba ifuna ukudlulela esigabeni samaqoqo.
Isinqumo esizodonsa amehlo ngesokukhipha uRenaldo Leaner, ogqame ngesikhathi kuqubuka ingxabano phakathi kwakhe noReeve Frosler ngemuva komdlalo wokuqala.
Umakadebona weqembu, uBruce Bvuma nguye othathe indawo yakhe emapalini.
UFernando Da Cruz uphinde washintsha indlela yokudlala, wabuyisela i-Kaizer Chiefs kwi-4-3-3 edle ngokuhlasela.
USibongiseni “Ox” Mthethwa uzobambisana noThulani “Touch” Mabaso noPule Mmodi esiswini.
Phambili, uMfundo Vilakazi akekho ohlwini lwabadlali abazoqala umdlalo, njengoba ezohlala ebhentshini.
UFaiz Abrahams uthole ithuba lokuqala, ejoyina uMduduzi Shabalala noWandile Duba phambili.
Kulo mdlalo akukho okuningi okumele kucatshangwe yiChiefs: idinga ukunqoba ukuze iqhubeke nomkhankaso wayo.
- FUNDA NALA | UZwane uqaphe ikhasi likabhanana kwiKruger
Ukwehluleka kungandisa ingcindezi kuFernando Da Cruz, osenokungabaza kwabanye abalandeli be-Kaizer Chiefs ngaye.
Ibophele kanje iChiefs: Bvuma; Cross, Frosler, Miguel, Moloisane; Mabaso, Mmodi, Mthethwa; Abrahams, Shabalala, Duba.
Ebhentshini: Petersen, Kwinika, Dortley, Ngkwesa, Maboe, Velebayi, Chislett, Vilakazi, Ighodaro.
- EZISHISAYO!| Cofa lapha usithole kuWhatsApp
